Shillong, Nailar 31
Ki pulit ka East Khasi Hills, ha ka janmiet jong ka 31 tarik u Nailar, 2026, ki la rah biang ïa ki nongïalam ka Khasi Students’ Union (KSU) kiba la shah kem, sha ïingkashari District and Session Court, Shillong, ban tian bishar.
Kine ki 3 ngut ki nongïalam ba la shah kem, ki kynthup ïa u Samla Raymond Khar-jana, President, Samla Reuben Najiar, General Secretary bad u Samla Pynkmenlang Sanmit, Vice President.
Ki pulit ki la rah lang ruh ïa u Samla Jeremaiah Pohtmi, Assistant Organi -zing ka KSU sengkmie.
Ka jingrah biang ki pulit ïa kine ki nongïalam ba la shah kem, kadei ba ki la shah pyn-ngat mukotduma biang.
La ïohi ruh ba ki nongïalam barim bad ki dkhot ki la kdup ieit ïa ki nongïalam ba la shah kem, da kaba kitbok ruh artad. Lah ban kdew ba ka jingshah kem ki nongïalam ka KSU, kadei hadien ba la mih ka jingjia huri hura ha ka jingpynlong ïa ka rally arshaka, kaba la wanrah ka jingshah thang dusmon ki kali Sorkar, ka jingshah pynpait pynpra bad kiwei-kiwei de.
Haba kren sha ki lad pathai khubor hadien ba la mih na ïingkashari, ki nongïalam ka KSU, ki la ong “Ka jingshah pyn-ngat mukotduma ïa ki, kadei ka jingthmu ban pynsynjor ïa ka seng, hynrei watla katta ruh, kim don jingsngew eiei”.
Ki nongïalam ki la ong, ba kam lei-lei lada shah pynngat mukotduma, namar mynta ka dang dei ka por jong ki, hynrei kin sa ai pat ka jubab ynda ki la mih na ka jingshah set.
