Shillong, Nailur 01
Ka jinglong jingman ba jai jai kala wanphai pat sha Shillong bad ki nongjngohkai kila sdang ban wan biang sha kane ka nongbah hadien ka jingjia kam thombor ha ka 19 tarik Nailar kiba jia ha ki kynta jong ka ‘bike rally’ ka KSU, ong u Deputy Commissioner ka EKH Abhilash Baranwal ha ka sngi Ba-ar.
U DC u pyntip ruh ba ka Sorkar kala weng noh ïa ki bor pahara Central Armed Police Force (CAPF) bad ka Rapid Action Force (RAF), kiba la buh ban pahara hadien ki jingjia thombor.
“Naba ki jingïakren ki dang ïaid bad ka KSU bad ba ka la weng noh ïa ka jingïakhih ïa mynta, nga ngeit ba ka jinglong jai jai kala wan phai pat. Ki nongjngohkai kila sdang wan biang sha kane ka sor bad ka district,” ong u DC.
U pyntip ba ka hotel booking ruh kala kiew biang hynrei kin dang ban kynjoh ïa u pud kumba ju long hashuwa kane ka jingjia ba 19 tarik Nailar.
Haba kylli halor ki case thymmai bala pynngat ïa ki nongïalam ka KSU, u DC u la ong ba u Superintendent of Police un lah ban jubab ïa kane.
