Shillong, Nailur 01
Ka BJP ka khmih lynti ban sa lamkhmat ïa ka Sorkar ha u snem 2028, ha kaba la thikna ba kan ïoh ïa ka jingjop haduh kumba 25-30 ngut, la ong u MLA ka Pynthor-umkhrah Konstitwensi, u Bah A.L Hek ha ka sngi Ba-ar jong ka taïew.
Haba kren sha ki nongthoh khubor, u Bah Hek u la ong ba ka jingpyntyllun ïa ka nongrim ka dangïaid shakhmat.
“Ngi la dep ban ithuh ïa ki jaka kiba kham kongsan, hynrei mynta ngi donkam tang ïa ka dur khmat kaba lah ban shaniah,” u la ong.
Katkum ka jingong u Bah Hek, kane ka thup ka kynthup ïa ki Konstitwensi ha kylleng ki lai tylli ki thaiñ.
“25-30 tylli ki seat la ithuh kum ki seat kiba lah ban jop da ka BJP ha ka ilekshon sha ka Ïingdorbar Thawaiñ ka Jylla ha u snem 2028 ban wan. Kine ki seat ki kynthup ha kylleng ka rilum Garo, Khasi bad Jaiñtia,” u la ong bad bynrap ba ka jinglah ban jop ka BJP, kan shong ha ka jingjied ïa ki kyrtong. U la ong ba ka seng ka pdiang sngewbha ïa ki dur khmat kiba thymmai sha ka seng.”
“Ka jingkhang jong ka BJP ka plie 24 kynta bad 365 sngi. Ngi long kiba kloi ban pdiang ïa uno-uno uba kwah ban ïasoh,” u la ong.
Halor ka jingkylli la un long ne-em kum u Myntri Rangbah ka Jylla, kum u nongïalam ba rangbah tam, u Bah A.L Hek u la ong, “Ym namar ba u Bah Hek u dei u nongïalam ba rangbah tam jong ka BJP, ym da donkam eh ban long Myntri Rangbah, uno-uno uba dei u nongïalam, u lah ban long u Myntri Rangbah na ka bynta u snem 2028.”
“Ngi donkam ïa u nongïalam u ban ïalam ïa baroh bad ban thaw ïa ka Sorkar kaba khlaiñ bha, ban shakri ïa ki paidbah ka Meghalaya,” u la ong biang.
U la bynrap, “Uno-uno u lah ban long Myntri Rangbah. Ka jinglong nongïalam, yn shim rai da ka Sorkar Pdeng. Ka thong jong ngi ka long ban thaw ïa ka Sorkar ba la ïalam da ka BJP ha u snem 2028.”
