Shillong, Nailur 01
U State-President ka National People’s Party (NPP) uba dei ruh u Symbud Myntri Rangbah ka Jylla, u Bah Prestone Tynsong ha ka Sngi Ba-ar u la ong ba ka jingïaid lynti jong ka NPP kaba 14 snem ka la dap da ki jingeh-jingtynjuh, hynrei dei tang ma ka, kaba la nud ban shim ïa ki mat kiba ki Sorkar ba hashuwa ki la kiar.
U la kren ïa kane hadien ka jingïalang jong ka jingrakhe ïa ka sngi seng ka NPP, kaba dei ruh ka lyngkhuh sngikha jong u nongseng ka NPP, u Purno A. Sangma (Bam Kwai ha Dwar U Blei).
“Ka jingrakhe ïa ka jingdap 14 snem mynta ka sngi, ka jia ryngkhat ba ka dei ruh ka lyngkhuh sngikha jong u nongseng jong ngi uba la khlad noh, u P.A. Sangma. Lada nga kynmaw, kine ki 14 snem ki la long kiba eh bha, khamtam hadien ba ngi la shimti ïa ka Sorkar ha u snem 2018. Ka dei ka samoi treikam banyngkong jong ngi ba ngi ïatreilang ban pynïaid ïa ki kam jong ka Meghalaya. Da ka jingaiei u Blei, ngi long kumne kumba ngi long mynta. Ngi la kiew bad ngi la heh la san haba phai sha ka jingïakhun ïa ki jingeh,” ong u Bah Prestone.
U la ong ruh ba ka Sorkar MDA ba la ïalam da ka NPP ka la shim ïa katto-katne ki mat kiba la sahteng la slem bah naduh u snem 2018.
“Naduh u snem 2018 haduh mynta, ngi la shim katto-katne ki sienjam. Ki don ki bynta ba ym don Sorkar kiba nud ban shimkhia ïa kita ki mat, hynrei ngi la leh ïa kata. Ngi la shimkhia ïa ka mat u pud u sam. Wat ka mat halor ka ‘Them Metor’ (jingtyrwa ban pynkynriah ïa ka Harijan Colony na Them Ïew Mawlong), ka mat kaba dang im. Wat ong ba ngi la klet ïa ka. Shen ngin sa don ka jingïalang ban pynbeit ïa kane ha ka rukom kaba bniah, namarba ka rai ka hap ban long katkum ka hukum jong ka ‘High Court’ naba ka mukotduma ka don hakhmat ka ïingbishar,” u la ong.
U Bah Prestone u la bynrap ba ki ‘Resolution’ halor ka ILP, ka ktien Khasi & Garo bad ka jingpyrshah ïa ki kam tih ‘Uranium’ ki pyni ïa ka jingshimkhia jong ka seng.
“Phi la ïohi ïa ki ‘Resolution’ halor ka ILP, ka ktien bad ka jingtih ‘Uranium’. Kiba bun ki mat ba kum kine kin sa mih shuh-shuh. Kine kin nang pynkhlaiñ shuh-shuh ïa ki paidbah ka Jylla da kaba pynleit jingmut kyrpang halor ka jingïada bad jingshngaiñ jong ki ‘riewlum jong ngi,” u la ong.
