Shillong, Nailur 01
U Nongïalam ka Bharatiya Janata Party (BJP) ha Meghalaya u Bah AL Hek, uba dei ruh u MLA ka Pynthorumkhrah ha ka sngi Ba-ar u la kyrshan ïa ki mat dawa ba la buh da ka Khasi Students’ Union (KSU) hynrei u la ong pat ba ka jingpynjot pynpra ïa u mot jong ki riewkhraw ka Ri ha ka jingïaid ‘bike rally’ ha ka 19 tarik u bnai ba la lah, ka dei ka bym lah satia ban pdiang bad kaba hap ban pynrem.
“Ki mat dawa ba la rah bad buh da ka KSU ki long kiba shongnia bad kiba shisha.
Ngim don eiei ban len ba ki dei ki mat kiba shisha na ka bynta ka thungkam thungjam, ka roi ka par bad baroh kita ki san tylli ki mat kiba la buh hakhmat. Nga ai ka jingïaroh ïa baroh ki mat,” la ong u Bah Hek.
“Hynrei ka lynti ban pynjot pynpra ïa u mot sah nam jong ki riewkhraw ka Ri kum jong u Subhas Chandra Bose bad Swami Vivekananda ka long shisha kaba bakla. Ban pynjot pynpra ïa ki mat jong ki, kam long satia kaba lah ban pdiang,” u la ong.
“Phi lah ban ïakhun na ka bynta ki mat dawa ki jong phi. Ngi mynjur bad baroh ki mat dawa hynrei ka lynti ruh ka dei ban long ha ka jingmut kaba dei,” u la ong.
Halor ka jingkylli hato ki pulit ki la pheil ban khanglad ïa ki kam thombor, u Bah Hek u la ong ba yn nym lah ban shim ba ki kam runar kin nym don tang namar ka jingdon jong ki pulit.
“Ki pulit ki don hynrei ngim tip kaei kaba don ha ka jingmut jingpyrkhat jong kito kiba leh bakla. Hato phi tharai lada don ki pulit, kan ym don ka jingpynïap briew, ka jingkhaïi tuh, ka jingtuh ha ka Jylla? Kam lah ban long,” u la ong.
