Shillong, Nailur 01
Ka bor pynïaid district ka East Khasi Hills ka la shim da ki lynti ba tyngeh pyrshah ïa ki nongpynïaid ïa ka jingïakob khwai dohkha kaba dang shen ha Mawryngkneng hadien ba ka la wanrah ïa ka jingpynthut ïa ka ïaid ka ïeng ki paidbah bad ka jingpynkheiñ ïa ka aiñ ïaid kali.
U Deputy Commissioner ka East Khasi Hills Abhilash Baranwal u la ong ba ki bor district kila phah ‘show cause notice’ bad la register da ka ejahar pyrshah ïa ki nongpynïaid.
“Ha kaba ïadei bad ki jingjia kiba la mih namar ka jingïakob khwai dohkha ha Mawryngkneng, ngi la phah show-cause notice sha ki nongpynïaid bad ha kajuh ka por ngi la bthah ïa ki pulit ban register ejahar pyrshah ïa ki nongpynïaid namar ka jingpynkheiñ ïa ki kyndon ba la buh ha ka jingai jingbit ban pynlong ïa ka ïakob khwai dohkha nalor ka jingpynthut ïa ka ïaid ka ïeng ki kali bad ki paidbah hapoh ka Motor Vehicles Act,” la ong u DC.
U la ong ba ki bor district kin wanrah noh ïa ka rukom kaba kham pyrkhing na ka bynta ban ai jingbit ïa kum kine ki jingïakob ha ki por ban wan.
“Kaei kaba ngin leh hadien habud, ngi dang pynkhreh ïa ki jingbthah ba nangne shakhmat ki nongpynïaid ïa kum kine ki jingïakob kin hap ban ai jingtip noh kham kloi bad kaba bniah. Ngin sa don noh ka jingleit jurip lang da baroh ïa ka jaka pynlong kum kine ki jingïakob,” u la ong.
Shuh shuh u DC u la ong, “Kumba ka long mynta ka jingjurip la leh da ka Block Office, hynrei nangne shakhmat ngin sa pynlong ïa ka jingjurip lang ïa ka jaka ha ka jingdonlang ki briew na ka tnad Pulit, Dorbar Shnong bad ki briew na ka tnad Fisheries. Ngi dang pynkhreh ruh ïa ki lad lynti ba ngin wanrah da ki kynja kuna ïa ki nongpynïaid lada jia ba ki jingïakob ki pynthut ïa ka ïaid ka ïeng ki kali ne ïa ki paidbah”.
