Shillong, Nailur 01
Ka thaiñ Sohra bad Mawsynram, kiba dei napdeng ki jaka ba jur slap tam ha ka pyrthei, ki la mad ïa ka jingduna slap ha u Nailar ha kaba ka Meghalaya ka la mad ka jingduna slap da 38 per cent hapoh une u bnai, kaba long katkum ka India Meteorological Department (IMD).
Ka Jylla ka la ïoh ïa ka jinghap slap kaba long tang 359.7 mm ha u bnai Nailar (August) pyrshah ïa kaba ju long 581.6 mm, la ïathuh katei ka ophis ba khmih ïa ka mariang.
Ka East Khasi Hills, ha kaba ka Sohra bad ka Mawsynram ki don, ka la mad ïa ka jingduna slap haduh 42 per cent hapoh u bnai Nailar.
Haba phai pat sha ki district, ka West Jaiñtia Hills ka dei kaba heh tam ka jingduna kaba long 75 per cent, bud da ka West Garo Hills kaba 72 per cent, West Khasi Hills 60 per cent bad North Garo Hills 58 per cent.
Ka East Garo Hills bad ka Ri Bhoi ki la ïoh ïa ka jinghap slap kaba hiar da 22 per cent, katba ka East Jaiñtia Hills ka duna 24 per cent u slap ban ïa kaba ju long.
Ka South Garo Hills ka la jan long kumba ju long ha kaba ka jingduna ka long 9 per cent, katba ka South West Khasi Hills ka long kaba ïoh bun slap tam haduh 155 per cent, kaba long kaba heh tam napdeng ki distrik.
Ka jinghap duna slap ha u bnai Nailar ka la wan hadien ba ka jylla Meghalaya ka la mad ïa ka jingduna slap da 9 per cent ha u bnai Naitung, katba ka jinghap slap ha u bnai Jylliew pat ka jan long kumba ju long.
Ka jinglong jingman jong ka jinghap slap ka la nang sniew ha u bnai Nailar, ha kaba 8 tylli na ki 11 tylli ki district jong ka Jylla ki la sakhi ïa ka jinghap duna bha u slap. Tang ka South West Khasi Hills ka la mad ïa ka jinghap slap kaba jur bad kiew bha ha u bnai Nailar, la kdew ka jingkheiñ jong ka IMD.
