Khliehriat, Nailur 01
U President ka Megha-laya Pradesh Congress Committee (MPSC) Ma Vincent H Pala uba long u kyrtong ka Congress ban ïakhun ïa ka ilekshon MP shiteng samoi na Shillong Parliamentary Constituency u la ong ba ka jingtlot ka Congress kam dei satia na ki nongthep vote hynrei ka dei namar ba ki nongïalam jong ka, ki shah thied noh.
U Bah Pala u la pynpaw ïa kane ha ka jingïalang ïalap ilekshon ha Lammyrsiang kaba hap hapoh ka 5-Sutnga Saipung Constituency.
Ha kane ka jingïalap ilekshon la wan poi da ki hajar ngut ki paidbah kiba na ki shnong bapher-bapher ka East Jaiñtia Hills District kiba dei ki nongkyrshan jong ka Congress.
U Bah Pala u la pynpaw ïa ka jingkyrmen ba ka Congress kan wanrah ïa ka jingjop ha kane ka kynti bad ong ba ki briew mynta ki la sngewthuh ba lada phah ïa kano-kano ka seng sha Delhi donkam ïa ka seng kum ka Congress kaba lah ban ïakhun pyrshah bad ïasaid na ka bynta ka bha ka miat u paidbah.
“Wat ong ba ka Congress ka la ïap, ka jingtlot jong ka Congress kam dei na ki nongthep vote, hynrei ka dei namar ki nongïalam kiba la shah thied noh,” la ong u Bah Pala bad kyntu ruh ïa ki paidbah nongthep vote ba kim dei ban ngop ha kano-kano ka jingshah pynbiej.
U la ai ruh ka jingïaroh ïa ki 2 ngut ki MDC ka Congress na JHADC kynthup u Ma Madonbai Rymbai bad Ma Rikut N. Parien kiba ïaineh bad ka Congress.
“Nga ap ïa ki khubor ba lano yn shah thied kine arngut ki MDC, namar ba uwei u MDC uba ka Congress ka la pynjop u la shah thied. Nga ïaroh ïa ki arngut ki MDC kiba ïaineh bad ka Congress”, la ong u Bah Pala.
U la pyntip ruh ba bun ki nongïalam ka Congress kiba la pynïasoh bad ka NPP mynta kila sdang ban wanphai biang sha ka Congress, namar ki ong ba ka NPP ka kut tang ha ka jingkular katba ki kam khlem seisoh. Ka jingsynshar kaba arsap ha kaba khatduh ka ktah ïa ka dohnud jong ki briew, u la bynrap.
Haba ïadei bad kane ka ilekshon, u Bah Pala u la ong ba kane kaba mynta ka long thik kum ha ka por ba u ïakhun nyngkong, ha kato ka por u la jop suk namar ba ki briew ki dang ieid ïa ka Congress. Hynrei u ngeit ba ha kane ka kynti ruh kan dei kumjuh, hynrei u la ong ba ka jingïapher ka dei tang kawei, ba mynshwa ki nongtrei jong ka seng ki khlaiñ bha ka rukom treikam ha man ki Unit.
“Haba nga leit kylleng-kylleng, nga ïohi ïa ki briew ba ki dang ieid palat ïa ka Congress, ka Congress kan sa kiew biang bad nga kyrmen skhem ba ngin sa poi biang sha kajuh ka kyrdan kaba ka ju don mynshwa. Ngi lah ban synshar bha bad ha ka lynti kaba biang bha ïa ki paidbah. Ha u 2029 ka Congress kan wan biang ha ka bor”, la ong u Bah Pala.
U Bah Pala u la kynnoh ba ka Sorkar MDA hapoh ka jingïalam ka NPP ka dei hi ka BJP, bad kumta ka lah ban ai jingkyrshan ïa ka Bill jingpynkylla ïa ki kyndon ka Foreign Contribution Regulation Act ha Parliament.
U la ong ha Meghalaya, ka Congress kam donkam ban pynrem ïa ka NPP, ka BJP hi kan pynrem ïa ka NPP kumba kala leh ïa kiwei ki seng kiba ïatreilang bad ka, kum na Maharashtra, Andhra Pradesh, Bihar, Odisha nalor kiwei-kiwei ki seng.
“Wat artatien ban ai ka jingkyrshan ïa ka Congress, dei tang ka Congress hi kaba lah ban ïakhun bad ïasaid bad ka Sorkar BJP,” ong u Bah Pala.
U la kren ruh halor ka jingdap ram jong ka Sorkar MDA kaba kot haduh 26 hajar klur tyngka. Kumba long mynta ka Sorkar kam don pisa namar ba ki revenue kiba bun kila leit sha ka pla jong kiwei. Ki riew saiñpyrthei ki la nang riewspah, katba ki paidbah ki nangduk nangduk, bad ba ki samla kila nang kyrduh kam kyrduh jam.
