Shillong, Nailur 01
Uwei na ki nongïasaid aiñ ka Jylla, uba la rangbah ha ka kam, u la mih shakhmat ban pynsngew halor ka jingïakhih ki muktiar ka Jylla kiba don hapoh ka lama, ka High Court of Meghalaya Bar Association bad Shillong Bar Association, kaba ka mat kaba hakhmat ba ki buh ka long ban weng kam ïa u Amit Kumar kum u Advocate General ka Jylla.
Haba kren halor kane ka phang, une u nongïasaid aiñ uba mut ban ïa aireng ïa ka ilekshon shiteng samoi MP sha Lok Sabha na ka United Democratic Party (UDP), u Bah V.G.K Kynta u la ong, ha ka sien ba nyngkong ba kane ka jingïakhih ki muktiar, kan dei kaba heh bad kane ka wan jia namar ka jingleh kyllut u Myntri Rangbah bad kawei ruh kadei ka jingai ding u Advocate General, u Amit Kumar.
“Hapdeng ka jingdawa ki nongïasaid aiñ, ka Sorkar ka la dei ban khot ha ka miej jong ka jingïakren, ban ïa pynbeit, hynrei u Myntri Rangbah ka Jylla, u set kyllut ki shkor bad leh matlah. Ka jingset kyllut u Myntri Rangbah, ka la pynkhluit haduh katta-katta, kaba la don ruh ka jingïaid paidbah ki nongïasaid aiñ,” la ong u Bah V.G.K Kynta.
U la kdew ruh “Mynta la don ruh ka jingai ding na ka liang jong u Advocate General, lehse kane kadei ka sien kaba nyngkong ka jingïakhih kaba jur bha hapoh ka Jylla jong ngi. Mynta naduh ka 01 tarik ki nongïasaid aiñ ki la rai ban sangeh treikam shuwa sha ïingkashari”.
“Nga sngew ba kane ka jingïakhih kadei kaba don jingmut bad ka Sorkar ka la dei ban khot ïakren ïa ki nongïalam ki nongïasaid aiñ, ban ïa pynbeit,” la ong u Bah Kynta, da kaba bynrap ruh “Lada ka Sorkar ka dang sngap mynthi halor kine ki jingdawa, kan sa nangjur ka jingïakhih”.
