Shillong, Nailur 01
Ka Joint Executive Committee (JEC) ba kynthup ïa ka High Court Meghalaya Bar Association bad Shillong Bar Association, hadien ba ki la sdang ïa ka jingïakhih ban sangeh treikam kum shi bynta ka jingdawa jong ki ban weng ïa u Amit Kumar, kum u Advocate General ka Jylla Meghalaya, ki la ïashong jingïalang bad u Chief Justice ka Jylla, ban ïakren halor kane ka kam.
Hadien kane, ka kynhun ka la ïakynduh ïa u Bah Lahkmen Rymbui, u Myntri ba dei khmih ïa ka tnad Law ka Sorkar Jylla, haba ïadei bad kane kajuh hi ka mat jingdawa jong ki.
Haba kren sha ki lad pathai khubor, u Bah T. L Jyrwa, Secretary, SBA, u la ong ba na ka liang u Chief Justice, u la ong ïa ki, ba kidei ban pyrkhat halor ka jingïakhih namar ba ka la don ka jingmana ïa ki, ban sangeh ka jingtreikam da kaba kdew ba wat hadien ka jingïakynduh bad u Myntri ruh um shym tip ei-ei halor kane.
U la ong ba dei halor kane ka daw ba kim banse ban hap ïaid shakhmat ïa ka jingïakhih.
“Ka jingbymsngap ka Sorkar Jylla ïa ki mat jingdawa jong ki, ka lah ban dei ka daw kaba sniew na kaba bha namar ba wat hadien ba ki la phah ïa ki jingthoh la bun bun sien, hynrei haduh mynta kim shym la ïoh ïa kano kano ka jubab,” u la ong.
U Bah T.L Jyrwa u la ong ruh ba ka jingïakhih jong ki kan ktah ïa ki paidbah bad wat ïa ki muktiar ruh, hynrei kim banse bad ban long kiba ïaishah shipor, namar ba ha ka 03 tarik Nailur, 2026, kin sa ïamir jingmut biang halor ka rai, ba kumno kin shim nangne shakhmat.
“Kum ka kynhun kaba mihkhmat ïa ki Bar Association baroh kiba don hapoh ka Jylla, kiba kynthup ïa ka Shillong Bar Association bad ka High Court Bar Association, ngi la shim ïa ka rai ban sangeh treikam shipor hapoh ka Iingbishar,” u la bynrap biang.
“Naduh ka sngi ba la pynlong ka jingïakhih kaba jai-jai haduh kane ka khyllipmat, ka Sorkar kam sym la jubab ïa ka jingdawa ka kynhun, bad kane ka rai kan treikam ha baroh kylleng ki district ka Jylla,” la ong u Bah T.L Jyrwa .
Da kaba pynshai ba kane ka jingshim rai ka kynhun kam dei kaba la leh khlem burom shuh ïa ka Iingbishar hynrei u la ong, ba ka rukom pyntreikam ka pheil kumne bad na ka liang ka Sorkar Jylla kam patiaw, ka kynhun kam banse ban shim ïa ka rai kaba tyngeh.
“Haba ïadei bad ka jingbym tip eiei u Myntri ka tnad law, u Bah Lahkmen Rymbui halor kane ka mat jingdawa jong ngi, ngi lah ban ong ba u Myntri Rangbah ka Jylla u Conrad K Sangma, u la leh marwei ban thung ïa u Amit Kumar kum u Advocate General ka Jylla Meghalaya,” la kynnoh u Bah T.L Jyrwa.
