Shillong, Nailur 01
U Symbud Myntri Rangbah ka Jylla, uba dei ruh u State-President ka NPP, Bah Prestone Tynsong ha ka Sngi Ba-ar u la ong ba ka Sorkar MDA kam don kano-kano ka jingma haba ïadei bad ka jingmih khubor halor ki 9 ngut ki MLA ka UDP kiba thmu leit pynïasoh noh sha ka BJP, da kaba pynpaw ba ka NPP hi marwei ka don ïa ka jingbun paid.
U Bah Prestone u la ong ba ki khubor ki mih tang ha ki lad pathai khubor bad kam shym la don kano-kano ka jingpynsngew hapoh ka kynhun synrop.
“Nga la ïohi ïa kane tang ha ki kot khubor. Ngi don ïa ki jingïalang jong ka MDA man ka por. Man ka por ba don ki mat kiba ïadei bad ki konstitwensi, ngi plie lad ban ïakren ïa ki. Baroh ki paralok ki kren ïa nga, ïa u Myntri Rangbah ka Jylla ne ïa u Bah Sniawbhalang Dhar bad ngi pynbeit ïa ki. Ngam ïohi ïa kano-kano ka jingeh,” u la ong, da kaba bynrap ba kane ka lah ban dei namar ki kam poh ïing, jingïashrut hapoh ka UDP.
La hato kane ka lah ne em ban ktah ïa ka NPP, u la ong ba ka Sorkar ka long kaba shngaiñ ha ka jingbun briew.
“Tang ka bor jong ngi marwei ka long 33. Ngi donkam 30-31 ban thaw Sorkar, kumta ngi la tam ïa kata,” la ong u Bah Prestone.
U la ong ruh ba ka NPP kan ym tuklar ïa ki kam poh-ïing jong kiwei pat ki seng.
“Ngim don eiei ban ong halor kane namar ka dei ka kam pohïing bad kam shimet jong ki. Hynrei ka Sorkar ka khlaiñ, ka skhem bad kan pyndep ïa ka samoi treikam ba pura jong ka haduh u snem 2028 bad hadien kata ruh,” u la bynrap.
