Shillong, Nailur 01
Ka jingbuh por ban pyndep ïa ka Special Intensive Revision (SIR), 2026 ha Meghalaya la pynjlan sa sha ka 14 sngi hadien ka jingthut ha ka liang ki ‘Hearing’ ha Shillong ha u bnai ba la dep, bad ïa ka thup kyrteng bakhatduh ki nongthep ‘vote’ yn sa pynmih ha ka 21 tarik u Risaw.
U Chief Electoral Officer (CEO) ka Jylla, u Dr. B.D.R. Tiwari ha ka Sngi Ba-ar u la khmih bniah ïa ka jingïaid shakhmat haba ïadei bad ka jingpynpoi ïa ki notis bad ki ‘Hearing’ bad ki Deputy Commissioner, DEO, ERO bad AERO, lem bad ki seng saiñ pyrthei.
Haba ai ïa ki jingtip ba bniah, u CEO u la ong, “Katkum ka jinglong-jingman kaba khatduh, la pynmih 6,51,735 tylli ki ‘notis’, bad na kine, 5,71,989 tylli ki notis la pynpoi sha ki nongthep ‘vote’ kiba dei hok. La bthah ïa ki distrik ban pynkloi ha ka jingpynpoi ïa ki notis kiba dang sah bad ban pyntikna ba ki nongthep ‘vote’ kiba dei hok kin ïoh ïa ki lad ki kabu kiba biang ban leit mih sha ki ‘Hearing’ ba la buh por, kumjuh ban pynbiang ïa ki kot ki sla kiba donkam.”
Na kine, la pyndep haduh 1,29,298 tylli ki ‘Hearing’. Ki heh ophisar ki la ïathuh ba la shem ïa 297 ngut ki nongthep ‘vote’ ba kim lah ban jied hadien ba la ïaid katkum ka rukom treikam.
Haba ban jur halor ka mat jong ka jingpynshisha, u CEO u la ong, “Katkum ki jingtip ba la khmih bniah, 2,22,786 ngut ki nongthep ‘vote’ ki hap hapoh ka thup kyrdan ‘No Mapping’, katba 4,28,858 ngut ki nongthep ‘vote’ la pynithuh bad ki jingbym ïahap ha ka ‘Mapping’, kaba ïalam shaduh 6,51,644 tylli ki ‘case’ kiba donkam ïa ka jingpynshisha.”
Kine ki kynthup ïa ka jingbym ïahap ha ka kyrteng bad ka kyrteng ki kmie ki kpa bad ki rekod jong u snem 2005, bad ki jingbym biang ha ka jingïapher rta hapdeng ki dkhot jong ka ïing ka sem ba la lap lyngba ka ‘ECINET’.
Shuh shuh u CEO u la bynrap ba ka East Khasi Hills ka la sdang biang ïa ki jingkam bad jingpyrshah lem bad ki ‘Hearing’ naduh ka 31tarik Nailar bad ki nongthep ‘vote’ kiba la pynkynriah ka ‘Hearing’ (jong ki) ki dei ban leit mih katkum ka por ba la pynbeit.
Ka por ba la pynbeit thymmai mynta ka buh ïa ka 18 tarik u Nailur kum ka tarik ba khatduh ban pynsngew ïa ki jingkam bad ki jingpyrshah, ka 17 tarik u Risaw ban pynbeit ïa ki jingkam bad ki ‘Hearing’, bad ka 21 tarik u Risaw ban pynmih ïa ka thup kyrteng kaba khatduh.
Nalor kane, u CEO u la ban biang ba yn ym leh ïa kano-kano ka jingpyndam na ka ‘Draft Roll’ khlem ka notis bad ‘Hearing’, bad kyrpad sha ki nongthep ‘vote’ ban pyndap ïa ka ‘Form 6’ lada ki kyrteng jong ki, ki jah bad ban leit sha ki ‘Hearing’ lada ki la ïoh pdiang ïa ki notis.
