Shillong, Nailur 02
Ki nonghikai kiba don ha ka shatri jong ka Meghalaya Vocational Education Teachers/Trainers Union (MVETU) ha ka nohphai sngi jong ka 02 tarik u Nailur, 2026, ki la hap ban mih biang sha surok ban dawa ïa ka hok jong ki.
Kum ban shu kdew, dang ha u bnai Jymmang, na ka liang u Conrad K. Sangma, Myntri Rangbah ka Jylla, u la hiar na kali kaba u shong, ban ïakren bad ki nonghikai ka Union bad kumjuh ruh ban ai ka jingkular ïa ki, ba un khot ïakren halor ki mat jingdawa jong ki, hynrei haduh mynta kane ka kam, kam pat urlong satia.
La lah ban sakhi ïa ki nonghikai kiba la ïeng hakhmat ka khyrdop ka All Saints’ Cathedral ha ryngkat ka jingrah ïa ki plakad kiba la dawa ïa ka jingïada ïa ka kam jong ki, ban wanrah noh da ka ‘pay structure’ kaba thymmai, nalor kiwei-kiwei pat.
Ki nonghikai ki la don da ki phew ngut, kiba la ïeng ban pynlong ka jingïakhih, ba kynthup ïa ki nonghikai shynrang bad ki kynthei ruh kumjuh.
Haba kren sha ki lad pathai khubor, u Bah Aibansuk Suchiang, nongïalam ka Union u la ong, ba na ka liang u Myntri Rangbah ka Jylla, u la kular ban khot ïakren ïa ki hynrei haduh mynta, kane ka kam ka khlem pat urlong satia.
“Wat hadien ba ngi la buh biang ïa ka shithi la bun-bun sien, hynrei ka Union kam ïoh satia ïa ka jubab kaba shai, na ka liang u Myntri Rangbah,” u la ong.
“Ka jingdawa ka jong ngi ka long kaba shai bha, ka jingpynkiew bad ban ai ïa ka jingsiew kaba thymmai kaban pynthikna ba ka jingtrei kumjuh ïa ka kam bad ka jingïoh kaba mar kumjuh. Kane ka la sahteng lah slem bha” ong u Bah Aibansuk Suchiang.
Katkum ka jingpynpaw ka Union, ki Trainers kiba khmih ïa ki Secondary Classes (IX-X) kiba la tam 3 snem ha ka jingai jingshakri ki ïohpdiang T.24,000, katba kito kiba khmih lang ïa ka Secondary bad Higher Secondary (IX-XII) palat ïa ka 3 snem ki ïoh T.30,000.
“Katei ka jingsiew kam long kaba ïahap bad ka kam kaba ki trei. Ngi hikai naduh na ka kyrdan Secondary haduh Higher Secondary bad ki sobjek ki jong ngi, kidei kiba bun bha kiba leh da ki ‘Practical’, ha kaba 30 Marks la ai ha ka Theory, 50 ha ka Practical bad 20 kum ka Internal” la bynrap u Bah Aibansuk.
