Shillong, Nailur 02
Ka Hynñiewtrep Youths’ Council (HYC), ka la kyntu ïa ka Public Accounts Committee (PAC) jong ka Meghalaya Legislative Assembly, ban khmih bniah mardor halor ka kam pisa tyngka ba la kdew ha ka CAG Report on State Finances, na ka bynta u snem mang tyngka 2024-25.
Ka seng lyngba u Bah Roy Kupar Synrem, President, ha ka 02 tarik u Nailur, 2026, ka la pyntip ba ka la phah jingthoh sha u Chairperson ka PAC, ban pan ka jingpynshai kaba bniah ha kaba ïadei bad ka ‘Investment’ jong ka Sorkar Meghalaya ha ki 22 tylli ki State Public Sector Enterprises (SPSE).
Ka Seng ka kdew ba katkum ki jingshem jinglap ka kaiphod CAG, ka Sorkar ka theh haduh 4,444.43 klur sha ki ‘Enterprise’ kat haduh ka 31 tarik u Lber, 2025 hynrei ka kaiphod jingïohnong pat ha u 2024-25 ka long tang 0.20 klur.
Nalor kane, ka HYC ka pynpaw ba ka Sorkar ka theh shuh sa 467 klur hapdeng u snem 2024-25 watla ka jingwanphai ka duna bha.
“Ka seng ka kdew ba lai tylli ki SPSE ki don jingïohnong hynrei kim siew phiah sha ka Sorkar, katba ar tylli pat kidei ki bym treikam,” la ong u Bah Roykupar.
U Bah Roykupar u la kyrpad ïa ka PAC, ba kadei ban lum ïa ki record jong baroh 22 tylli ki SPSE, ban lap ba kino ki SPSE kiba dang treikam, katno ka jingïohnong jong ki, kumno ki pyntreikam ïa ka pisa ba ka Sorkar ka ai ban pyntreikam. Kita ki bym treikam shuh ka PAC kan pynthikna ban ai jingmut sha ka Sorkar, ba ym dei ban ai pisa shuh.
