Shillong, Nailur 02
Ka ïingbishar Meghalaya High Court kala pynpaw ïa ka jingbym sngewhun bad ka jingïaid jong ka jingtohkit halor ki kam thombor, pynjulor kali bad shoh ïa ki briew ba ïaid lynti ha ka ‘bike rally’ ka KSU ha Shillong, haba pynpaw ba ki pulit kila dei ban pynsangeh ïa ka rally hadien ba ki nongïaid rally kila pynkheiñ ïa ki kyndon ai jingbit.
Ka division bench ka Chief Justice Tevati Mohite Dere bad Justice W Diengdoh haba shong bishar ïa ka suo motu PIL (PIL No. 16/2026), ha ka sngi Ba-ar, kala bthah ïa ki Pulit ban pynsted ïa ka jingtohkit bad ban ithuh ïa ki briew kiba donkti ban leh ïa ki kam thombor.
La pyntip sha ka ïingbishar ba haduh 22 tylli ki ejahar la dep ban register halor kane ka jingjia- saw tylli ha thanad Shillong Sadar, 9 tylli ha thanad Rynjah, 7 tylli ha thanad Mawlai bad mar kawei ha thanad Laitumkhrah bad Lumdiengjri.
La pyntip ïa ka ïingbishar ba ki pulit kila kem ïa saw ngut ki briew, baroh ki dei ki nongïalam ka KSU nalor ka jingïoh kurup ïa artylli ki kali kiba kynnoh pyndonkam ha kine ki kam thombor, ka jingbishar ïa ki jingïakren phone na ki 8 tylli ki mobile phone bad ki video CCTV na ki 27 tylli ki jaka.
Hynrei ka ïingbishar kala pynpaw ba kam sngewtynnad satia ïa ka rukom ïaid jong ka jingtohkit.
Katkum ka jingong ka ïingbishar, ïa kane ka rally la dei ban pynsangeh noh shiteng hadien ba ki nongïaid rally kila pynkheiñ ïa ki kyndon ai jingbit jong ki bor district. Ka ïingbishar kala pynpaw ba ki nongïaid rally kila deng mask lane tap ïa ki durkhmat watla kala don ka jingkular na ki nongpynlong rally ba kin nym leh ïa kata.
Ka ïingbishar kala kdew ruh ïa ka jingkynnoh pynkheiñ ïa ki kyndon ba khang ïa ki nongïaid rally ban rah dieng, lathi lane ki tiar pynmynsaw. Kala kdew ruh ba ïa ki nombor kali la tap ha kane ka rally.
Ka ïingbishar ka shem ba jin lada ki pulit kila pynsangeh ïa ka rally haba ïohi ïa ka jingpynkheiñ ïa ki kyndon ai jingbit, kin jin da la lah ban khanglad ïa ka jingpynjulor ïa ki kali bad ki nongkynti bad shoh ïa ki briew.
Ka ïingbishar kala pan jingshai ruh la ïa kane ka jingïaid rally la ring video ne em naduh ka jaka ba sdang bad la ki pulit kila bud ryntih ïa ki jingbthah ka ïingbishar Supreme Court ha ka mukotduma Tehseen S Poonawalla v Union of India ba ïadei bad ki kam thombor paidbhur.
Kala kylli ruh la ki don kino-kino ki ophisar pulit kiba tuklar lane pyrshang ban pynsangeh ïa ka rally, ka jingshoh ïa ki briew lane ka jingpynjulor ïa ki nongkynti ha kino-kino ki khep.
Haba pynpaw shuh-shuh ïa ka jingsngewkhia, ka ïingbishar kala buh jingkylli ba kumno ki pulit ki ithuh ïa ki saw ngut ki briew ba ka suba bad kem haba da ki spah ngut ki runar, ki donkti ban leh ïa kine ki kam thombor ha ka rally.
Ka ïingbishar kala bthah ïa ki pulit ban ithuh ïa kito kiba donkti kham kloi katba lah ban pynpoi ïa ka jingtohkit sha ka jingkut kaba don jingmut, haba ban jur ba ym dei ban map ïa kito kiba shoh ïa ki briew lane ba pynjulor ïa ki nongkynti.
Halor ka jingthung ïa ka SIT bala khlieh da u Inspector General of Police, ka ïingbishar ka bthah ba ïa kine ki jingpynsngew ka ïingbishar dei ban rah sha ka jingkhmih jong u khliehduh ka SIT khnang ba yn lah ban shim ïa ki sienjam ba mar mar ban ithuh ïa kito kiba donkti ha ki kam thombor.
La bthah ïa u Inspector General of Police, Superintendent of Police, East Khasi Hills, bad ki officers-in-charge ki thanad ka Shillong Sadar bad Lumdiengjri ba kin don hapoh ka ïingbishar ha ka sien shong bishar ban wan. La bthah ruh ïa ki pulit ba kin aiti ïa ka kaiphod halor ka jingïaid jong ka jingtohkit.
Ïa kane ka mukotduma la buh ban bishar biang ha ka 7 tarik Nailur.
