Shillong, Nailur 03
U MLA ka North Shillong Constituency u Bah Adelbert Nongrum u la buh jingkylli ïa ka rukom pyntreikam ka Sorkar Jylla ïa ka Meghalaya State Reservation Policy ïa ka rukom buh bhah ha ki jingpule kiba kham heh da kaba ong ba kane kam ïahap bad ka Riti Synshar ka Ri.
Ha ka jingthoh ba u la ai sha u Chief Secretary u Dr. Shakil P. Ahammed, u Bah Adelbert u la pynpaw ba ka Meghalaya ka ïoh ïa ka bhah hapoh ka ‘Central Pool Quota’ na bynta ka MBBS, Paramedical, Engineering, Architecture, Agriculture bad Veterinary Courses ha ki jaka pule shabar ka Jylla.
U Bah Adelbert u la kynnoh ba ki nongapplai ïa kine, ki shah jied da kaba shim katkum ki kyrdan bad ki Percentage kiba la buh hapoh ka Meghalaya State Reservation Policy, kaba kynthup ïa ki Khasi-Jaiñtia, Garo bad kiwei ki jaidbynriew riewlum kumjuh kiba wan na ka General Category.
“Kane ka rukom buh bhah ba kyrpang ka dei na ka bynta ki Khasi, Jaiñtia bad Garo kiba dei ki nongshong shnong ba pura jong ka Jylla bad ki General Category” u la ong bad u la pynkynmaw ruh ba bunsien u la ju rah ïa kane ka mat hapoh ka ïingdorbar thawaiñ ka Jylla ha kaba u la shah rem noh namar ka jingduna kiba kyrshan, hynrei u la pynpaw ba ka nongrim jong u ka skhem bad ka ïai khlaiñ wat haba shah rem ruh.
U la ong ba ka Reservation Policy ka dei kaba thmu nyngkong eh na ka bynta ka kam bad u la buh jingkylli ïa ka jingpynjlan ban pynrung sha ki jaka pule ba kham heh ha ka jingbym don ka polisi buh jaka kyrpang na ka bynta ka jingkiew ha ka pule puthi.
U la ïathuh ba u la buh por 30 sngi ïa ka Sorkar Jylla lyngba u Chief Secretary ba kan pynlong ka jingbishar bniah bad ban ai ïa ka rai kaba biang eh haba ïadei kane ka bynta, lym kumta u la ong ba ka Sorkar ka pynbor ïa u ban shim da kiwei pat ki lynti haba ïadei kane ka kam.
