Shillong, Nailur 03
U nongïalam ba rangbah ka UDP, u Bah Paul Lyngdoh ha ka Sngi Palei u la pyntikna ba ka don ka jingbymhun hapoh ka United Demo-cratic Party (UDP) hadien ka jingmih khubor ba 9 ngut na ki 12 ngut ki MLA ka seng ki thmu ban pynïasoh noh sha ka BJP.
U Bah Paul, MLA ka West-Shillong u la ong ba kane ka jinglynga ka mih na ka jingbym don ka jingroi kaba paw bad ka jingkdew lynti ha ka seng.
U la pynpaw ruh ba u la rah ïa kane ka mat ha ka jingïalang ‘General Executive Council’ jong ka UDP ha ka taïew ba la dep, ha kaba katto-katne ngut ki nongïalam ki la pynpaw ïa ka jingsngew-khia ba ka seng kam ïaid shaphrang.
“Kane ka jingbym-hun hapdeng ki MLA ka dei kaei-kaei kaba ma nga hi nga la pynpaw,” la ong u Bah Paul bad bynrap ba ki nongïalam ha ka jingïalang ki la ong ba kim ïohi dak eiei ba ka seng kan ïaid shakhmat.
U la ong ba u la pan ruh ïa ka kaiphod jong ki 2 ngut ki Myntri ka UDP hadien ka jingbujli shuki ha ka Kynhun Myntri ha u bnai Nailur jong u snem ba la dep, ka ban sa dap shisnem mynta u bnai.
Katkum ka jingong u Bah Paul, ka jingbym shai halor ka lawei jong ka seng ka la pynlong ïa kiba bun ngut ki nongthaw aiñ ban kulmar jingmut bad pynlong ïa ki ban wad ki lad ki lynti.
U la ong ruh ba ha ki ar snem shiteng ba u long Myntri, u la ïohi ba ki jingtyrwa halor ka roi ka par na ki MLA ka UDP haba ïadei bad ki konstitwensi jong ki kim shym la ïoh ïa ka jingphai khmat kaba biang.
Halor ki khubor kynriah seng, u la ong nalor ki 9 ngut ki MLA, ka don ruh ka jingïakren sa jong 2 ngut ki MLA kiba la khreh ban leit pynïasoh sha kiwei pat ki seng.
Shuh shuh u Bah Paul u la pynshai ba um don bynta ha ki ar tylli ki jingïalang ba la pynlong da katei ka kynhun (ka pynpaw ïa ka jingbymhun).
