Shillong, Nailur 03
Da kaba kynnoh ba ka dei ka jingpyrshang kaba thmu ban ïada ïa ka jingtih dewïong beaiñ, u Nongïalam ka Liang Pyrshah u Mukul Sangma ha ka sngi Palei u la ong ba baroh ki mukotduma jong ki kam beaiñ la pynïasoh lang ban pynthikna ba kin ïai bteng khlem kut por.
Haba kren sha ki nongthoh khubor, u Mukul u la ong, “Man la ka por ba ngi pyrshang ban rah ïa katei ka mat hapoh ka ïingdorbar, la ju ong ïa ngi ba ka dei ka kam ba dang hap ha jingbishar ka ïingbishar (sub-judice). Hynrei lada ngi pynïasoh lang ïa baroh ki kam beaiñ, ka jingbishar ka kylla long kaba eh bha.”
“Ki ejahar ki ju ujor pyrshah ïa ki jingjia ba kyrpang jong ka jingtih dewïong beaiñ, hynrei ki ophisar tohkit ki ïathuh ha ka ïingbishar ba kam don kano kano ka sakhi kaba skhem ban ïaid shakhmat. Ka kaiphod jong ka komiti ka pynpaw ba kine kiei-kiei ki jia, hynrei ha ki jingïalang ki ong ba kam don kano kano ka sakhi bad ki briew ki leit khlem sakhi,” la ong u Mukul.
Haba kylli ïa ka 32 lak metrik ton u dewïong uba la mih ha u snem 2018, u Myntri Rangbah barim u la ong ba la sah sa tang kumba 2 lak MT hadien ba la pynkit ïa u dewïong ba la dep lum hadien ka jingkhang jong ka NGT ha u snem 2014.
“Hadien ka jingkhang jong ka NGT ha u snem 2014, la pynshisha ïa ki jingdon jingem bad ki commissioner ba laitluid ba la thung da ka NGT, ym tang da ka tnad. La shah ban kit tang ïa u dewïong ba la dep tih katkum ki jingdon jingem ba la pynshisha, ka jingpeit bniah kaba kham jylliew,” la ong u Mukul.
U la ong ba u la pynpaw ïa ka jingbym ïahap ha ka jingbun u dewïong ha West Jaiñtia Hills hadien ka jingpynshisha shimet bad u la pan jingtohkit ba laitluid na u Chief Secretary jong katei ka por u MS Rao, hynrei ym shym la leh eiei.
