Nongstoiñ, Nailur 03
Ha ka sngi Palei jong ka taïew u majistor Bah L Pohshna MCS, Assistant Commissioner ka Mawshynrut Civil Sub-Division ha ka jingsynran lang ki pulit lem bad ki dkhot ka All Meghalaya Labour Association (AMLA) Mawshynrut Circle ki la ïoh ban khang khyrdep noh ïa 6 tylli ki khyrdop lum pisa kiba don ha shilynter ka surok Riangdo-Athiabari ha West Khasi Hills.
U Bah Banlang Sohphoh, President ka AMLA hadien katei ka jingleit khang ha ka jingdonlang kiwei ki dkhot u la ïathuh ba kumba hynriew tylli ki khyrdop lum pisa, la ïoh ban khang ha kane ka sngi hynrei ka jingangnud jong ka seng ka long ba baroh ki khyrdop kiba dang don dei ban khang noh bad ka Association kan ïai ap ïa ki bor district ba kumno-kumno ba hapoh 20 sngi ïa kine kiba dang sah yn pyndep noh.
Shuh shuh u la ong ruh ba na ka liang ka Association ha kane ka sngi kala ïa synran lang ïa u majistor bad ki pulit ban khang noh ïa kitei ki khyrdop.
Shuh shuh u Bah Banlang u la ïathuh ba ïa katei ka kam, ka Association kala sdang naduh ka 15 tarik u bnai Jylliew bad la dep ban phah ïa ka jingthoh sha ka DC West Khasi Hills bad ha ka 17 tarik la leit ban ai ka jingthoh sha ka KHADC hynrei kaba sngewkhia shuh shuh mynta ba ka Association ka lap da la ki jong ki khmat ka long ba ha kane dang mih sa kawei pat ka khyrdop jong ka KHADC bad kine kiei-kiei baroh ka long ka bym shai bad kumta ka Association ka kyntu ïa ka KHADC ba kan pynshai ba kaei ka daw ba dang pynmih thymmai bad ha kano ka bynta.
U la ïathuh ruh ba kitei ki hynriew tylli ki khyrdop lum khajna ïa kaba la khang ha katei ka sngi ki kynthup kawei ha Pormawthaw, ha Mawstieh, ha Nong Myndo ka Forest check gate, ha Nongkyndang bad sa ar tylli ki dei ha Chisimpara bad ha Athiabari.
U Bah Banlang u la ong ruh ba na ka liang ka Association hi kan nym shah bad nym ailad namar kane ka ktah ïa ki riew paidbah ha ka kit ka bah ka khaïi ka pateng jong ka thaiñ hi baroh kawei.
