Shillong, Nailur 04
Ka Khasi Students’ Union (KSU) CEC ha ka 04 tarik u Nailur 2026, ka la shong ïa ka jingïalang pyrkhat kam ha ophis treikam ka seng, ban ïakren halor ki mat ba la pynsngew sha ka Sorkar bad ruh ban pyrkhat kumno ban buddien ïa kiei ba ka Sorkar ka la kular hakhmat ka seng ha ka jingïakren kaba long ha ka 26 tarik u Nailar 2026 ha Secretariat.
Ha ka jingïalang ka CEC, ka la rai ban ïai buddien ïa ki 5 tylli ki mat kiba ka Sorkar ka la kular hakhmat ka seng ha kine ki taïew ban sa wan, bad kata ka long ban buddien khamtam ïa ka Facilitation Centre ha Umling bad Ratacherra bad ruh ka jingpyntreikam ïa ka Migrant Workmen Act, kumba la ïakut 20 sngi.
Ka seng ha kane ka jingïalang bad lyngba kane ka kyrwoh ka pynpaw ruh ïa ka jingsngew bitar halor ka jingshah thep mukotduma ki nongïalam ki jong ka, jan man ka sngi bad khamtam ïa ka jingshah kem u Samuel Kharbani, uba long u General Secretary ka KSU Shillong Mihngi Circle, ha kaba ka jingshah khot ka jong u sha Sadar, kadei na bynta ka jingpyrshah jur ka seng halor ka jingtei mandir beaiñ hapoh ka CBI ophis kaba long ka ophis Sorkar bad jong u paidbah hynrei ka Sorkar pat, ka dung nadien ïa ki dkhot da kaba pharep kulmar bad kem bad thep mukotduma ha ka jingjia ha ka jingïaid bike rally ka seng ha ka 19 tarik.
“Kane ka pyni ïa ka jingtlot bad ka jingbymler ka tnad pulit ba kim lah ban kem ïa kiba donkti hynrei ki shu kem kulmar ïa ki dkhot ba hakhmat ka seng, ban pynhun ïano re ïano, khlem ki sabut ba biang ba ki leh ïa ka kam ba sniew,” la ong ka KSU.
Halor ka jingshah khot hajir bad jingpyndik ka Sorkar ïa ki dkhot ka seng, ka seng ka buh ruh ïa ka jingkylli mynta ba haba ki pulit ki khot kumne bad pyndik kumne, hato ka tnad pulit ka la kem ne em tang u wei u briew uba pynjulor kali, uba tih ïa ka surok paidbah bad uba donkti ha ka thombor ïa ki paidbah ba leit pyrshah ïa ka Public Hearing ha ka janmiet jong ka 30 bad step jong ka 31 tarik u Naitung ba long ka Public Hearing ka Shree cement ha Lum Syrman Elaka Nongkhlieh.
“Haba ka aiñ, kadei ïa baroh bad balei ka noh shiliang tang ïa ki dkhot ka seng ba tang ka sakhi sabut kim don hynrei ki kem naphang, kane ka pyni ba ka aiñ hi ka noh shiliang haduh katta-katta, ba wat hadien ar bnai ruh ka seng kam pat ïohi u wei ruh u ban shah kem ba leh ïa kane ka kam thombor ha ka Public Hearing. Halor kane ka seng kan nym shongkli kti bad ka ai por ïa ka Sorkar 3 sngi ban kem noh ïa kine ki briew ba don kti bad wat ïa ki briew Sorkar ruh, kiba lah ban donkti lym kumta, ka seng kan hap ban pyrkhat da kiwei pat ki lad ki lynti hadien kane ka por ba la buh,” la ong ka KSU.
Ka KSU da ka rai rangbah ba la shim mynta ka sngi, ka la rai ba lada ym urlong kine ki jingdawa bad ba lada ka Sorkar kam pyni dak pyni shin ïa ki mat jingdawa ba kin treikam noh mar-mar, ka seng kam banse ban weng ïa ka ‘temporary suspension’, ban ïakhih kumba la pynbna ha ka 26 tarik u bnai ba la dep bad kan bteng biang ïa ki jingïakhih nangne shakhmat.
Ka KSU kan buddien bad peitngor ïa ki sienjam jong ka Sorkar halor kine ki mat ha kine ki sngi bad ka seng ka pynpaw biang ba ka jingïai sngap jong ka Union kam dei ka dak jong ka jingpdiang ïa ka jingpynslem. Ka Union ka la ai por ïa ka Sorkar ban pyni ïa ka jingtreikam bad ka jingpynbeit. Lada ka Sorkar kam ai ïa ki jubab kiba biang, kam pyni ïa ki sienjam kiba shai, ne ka bteng ban pynslem ïa ka jingpyntreikam ïa kine ki mat, ka KSU kan sdang biang ïa ki jingïakhih paidbah ha ka rukom kaba dei.
Ka seng ka pynshai ba ka jingïakren ka don jingmut tang lada ka wanrah ïa ka jingtreikam. Ka jingïai ap jong ki paidbah bad ki samla jong ka Jylla, kam dei ban shim kum ka jingpdiang ïa ka jingbymtreikam jong ka Sorkar.
“Ka Sorkar mynta kadei ban jied, ka jingpyntreikam ïa ki mat jingdawa jong ki paidbah ne ka jingsdang biang ïa ka jingïakhih paidbah jong ka KSU,” la bynrap ka KSU.
