Ka NPP kan nym shet kylla ïa ki paidbah da kaba bujli ‘uniform’, ong u Bah Sniawbhalang

Shillong, Nailur 04

U National Vice President jong ka NPP Bah Sniawbhalang Dhar uba dei ruh u Symbud Myntri Rangbah ka Jylla ha ka sngi Thohdieng u la ong, ka NPP kan nym shet kylla ïa ki paidbah da kaba bujli ïa ka ‘uniform’ saiñpyrthei, hapdeng ka jingïakren ba ki don ki katto katne ki MLA kiba thmu ban pynïasoh sha ka BJP.

Haba ai jingkren ha ka jingïalang ïalap ilekshon ha Mawryngkneng, u Bah Sniawbha u la ong, “Ki don ki nongïalam (na kiwei pat ki seng saiñpyrthei) kiba kwah ban rung sha ka BJP mynta hynrei kynmaw ba ka NPP kam ju shet kylla ïa ki paidbah, phi la jied ïa ngi ha kane ka riam, ngin neh beit ha kane ka riam. Lada ngi shet kylla ïa phi, ngi shet kylla ïa ki paidbah ka bri Hynñiewtrep Hynñiewskum.”

Halor ki jingkynnoh ba ka NPP ka dei hi ka BJP, u la ong, “Haba ngi ïatreilang bad ka BJP ka mut ba ngi trei na ka bynta ka roi ka par.”

U Bah Sniawbhalang u la ong ba ka seng ka don ïa ki nongrim bad ka bunkam ha ki kam paidbah.

“Ngim ju kren beiñ ïa ki paralok ne kren beiñ ïa ki briew,” u la ong.

Haba ïada ïa ka pisa jong ka Sorkar, u Bah Sniawbhalang u la kyntait ïa ki jingkynnoh ba ka ram ka la nang kiew.

“Don ki katto katne ki seng kiba ong ba ka Sorkar MDA ka dap da ki ram, kane ka long kaba bakla lut. Ka Sorkar kam lah ban shim ram katba ka mon, ki don ki kyndon bad ki jingbthah ha ka liang ka pisa tyngka,” u la ong.

Halor ka jinglong nongïalam, u Bah Sniawbhalang u la ong, “Ki don ki nongïalam kiba don tang ka ktien khlem ki kam, ki don ki nongïalam ki bym kwah ban kren hynrei ki leh bad pyni da ki kam. Ngam ju kren than nga pyni da ka kam, dei na kata ka daw ba ki briew jong nga kim shym la duh jingshaniah ha nga la 20 snem.”

U la ong ba ïa ki mat ïakren dei ban pynbeit sha ka miej ïakren, ym ha ki surok.

“Ngim dei ban ïakren ïa ki mat ha surok, ngin ïakren bad ïatai ha ïingdorbar, hapoh, ha ka miej bad ngim dei ban ïalam ïa u paidbah sha surok,” u la ong.

“Lada ki nongsynshar kim sngap ïa ka sur jong ki paidbah, kim long kiba bit ban long ki nongsynshar,” u la ong.

“Hapoh ka ïingdorbar ngim ju leh politik, ha ka madan kaba kum kane ngin leh politik,” bynrap u Bah Sniawbhalang.