Shillong, Nailur 04
U kyrtong MLA barim ka UDP ka Mawryng-kneng uba dei ruh u kyrtong MDC shimet u Dr. OS Jyrwa u la kynnoh ba ka Executive Committee ba ïalam da ka Voice of the People Party (VPP) hapoh ka KHADC ka la pynduh ïa ka bor synshar aiñ tynrai lyngba ka aiñ thymmai.
Haba ïalap ilekshon na ka bynta u kyrtong MP jong ka NPP na Shillong Constituency u Dr. DRL Nonglait ha Mawryngkneng ha ka sngi Thohdieng, u Dr. Jyrwa u la ong ba ka jingthmu ban buh ïa ka Land Bill bad ka Land Ceiling Act ka thmu ban ïaid lait noh ïa ki Rang-bah Shnong, Dorbar Raid bad Dorbar Hima.
“Haba ngi kylli balei ki weng ïa ki Rangbah Shnong, Dorbar Raid, Dorbar Hima, ki ong ba kam donkam lada ngi pyntreikam ïa ka Land Ceiling Act namar yn pyntreikam lyngba ka District Council,” u la ong ha ka jingïalang paidbah.
U Dr. Jyrwa u la kdew ba la weng noh ïa ka Clause 16 kaba pynlong ïa ka jingïasyllok bad ki khlieh shnong ban long kaba donkam.
“Kumno phin ong ba phim pynduh bor haba phi la weng noh ïa ka kyndon 16? Kata ka kyndon ka kren shai ba lada pyntreikam ïa ka Land Ceiling Act dei ban don ka jingïasyllok bad ki nongïalam shnong, hynrei ki kwah ban ïaid lait ïa ka,” u la ong.
Haba pynpaw ba man la ka shnong ka don la ka jong ka riti dustur, u Dr. Jyrwa u la ong ba ym lah ban pynjari da ka aiñ kaba kyllum.
“Ha Mawryngkneng, ka la don lypa ka kyndon ba ym bit ban die jaka sha ki briew kiba nabar. Kata ka dei ka jingsynshar shnong jong ngi. Ka jaka ka dei ka jong ka shnong, ka jong ka Raid bad ka Hima, hynrei kin knieh noh ïa kane ka jinglong trai. Kata ka long kaba bakla haduh katta-katta,” u la ong.
U kyrtong MDC barim u la kynthoh ruh ïa ka VPP halor ka jingkular jong ka shwa ka ilekshon ban weng noh ïa ki khyrdop siew khajna.
“Shuwa ka ilekshon MDC ki la ong ba yn nym don shuh ki khyrdop lada ngi wan ha ka bor. Mynta ba ki la wan ha ka bor, ki khyrdop ki la nang bun. Kiba ngi jied ki la kylla long ki nonglum khajna ha ki khyrdop,” u la kynnoh.
Haba khot ïa ka ilekshon MP kum ka lad ban pynmih ïa ka rai halor ki nongïalam ka KHADC kiba mynta, u Dr. Jyrwa u la ong, “Ha ka synshar paidbah, ka bor ka shong ha ki paidbah. Phi don hakhlieh duh, phi dei ki nongthep vote, phi ai bor bad phi shim noh ïa ka bor.”
Haba kynthoh ïa ki jingkynnoh ba la siew ïa ki paidbah ban leit sha ki jingïalang jong ka NPP, u la ong, “Lada ym don mynsiem, wat lada phi ai pisa ruh ngan ym wan jingïalang. Ki paidbah ka Mawryngkneng ki wan namar ba ki ieid ïa u Dr. Nonglait.”
U CEM barim ka KHADC u Bah Pyniaid Sing Syiem uba la ai jingkren ruh ha kane ka jingïalang u la ban jur ïa ka jingdonkam ban jied ïa u MP uba lah ban ïada ïa ka hok riewlum ha Parliament.
U la pynkynmaw kumno ki nongïalam ki la pynskhem ïa ka Sixth Schedule ha u snem 1950 watla kim don ïa ka riti synshar kham mynshuwa.
“Da ka jingtrei shitom bad ka jingïalam jong ki riew rangbah jong ngi, ki la lah ban pynrung ïa ka Sixth Schedule ha ka riti synshar ka ri,” u la ong.
U la ong ba ïa ki District Council la thaw ha u snem 1952 ban ïada ïa ka khyndew ka shyiap, ka riti dustur bad ka synshar shnong, hynrei ban pynkhlain ïa ki ka la shim por da ki phew snem.
“Ngi la don palat 70 snem ki District Council, hynrei ngi la ïoh ïa ki aiñ tang katto katne snem mynshwa namar ba ngi don ki briew kum u Bah Sniawbhalang Dhar ha ka Sorkar Jylla kiba la ïarap ban ïoh ïa ka jingmynjur ïa ki aiñ jong ka District Council,” la ong u Bah Pyniaid.
Halor ka jingthmu ban pynkylla ïa ka riti synshar ka ri kaba 125 kaba ïadei bad ka khyrnit kaba hynriew, u Bah Pyniaid u la ong ba mynta ka don ha ka tnad kam pohïing hadien ba la eksamin da ka Standing Parliamentary Committee.
“Ka nusib jong ka jaidbynriew jong ngi ka sah ha Delhi kumno ban rai halor ka Sixth Schedule bad ki District Council. Ngi donkam ïa u MP uba ka Parliament kan sngap. Ngim dei ban jied ïano-ïano ban leit shong ha kawei ka kut ha Parliament,” u la ong.
“U Dr. Nonglait u dei uba bha tam napdeng kiba bha tam ban leit sha Parliament,” bynrap biang u Bah Pyniaid haba pan jingkyrshan ïa u kyrtong ka NPP.
