Lap ka BP Katakey ba ka trok kit dewïong ba kylla ka la ïaid khlem ka ‘permit’ ba biang

Shillong, Nailur 04

Kawei ka trok kit dewïong kaba la kylla ha Mawiong hajan ka MecoFed ha ka 24 tarik Nailar, la kynnoh ba ka ïaid khlem ka Mineral Transport Challan (MTC) kaba biang, la peit bniah da ka Justice B P Katakey Committee ha ka kaiphod shipor kaba 40 (40th interim report) kaba la aiti sha ka ïingbishar Meghalaya High Court.

Ka komiti ka la shim da ka case suo-moto halor ki dur khih ba la pynmih da kawei ka lad pathai khubor ha kaba ïadei bad ka jingjia aksiden kaba hap hapoh ka thanat Mawlai bad ka la pan kaiphod na u Assistant Inspector General of Police (Law & Order).

Katkum ka kaiphod jong u Superintendent of Police (DSB), East Khasi Hills, ba la aiti ha ka 25 tarik u Nailar, la ïathuh ba kane ka jingjia aksiden ka la jia hapdeng ka por 3:30 bad 4:00 baje mynstep jong ka 24 tarik u Nailar bad la ïoh jingtip ha ka por kumba 9 baje mynstep, bad ha kaba ki pulit pynïaid kali ki la poi sha katei ka jaka.

Kane ka trok kaba don ïa u registration number AS01-AC-8401 ka dei kaba la ñiah da u Firingsstar Marwein na ka shnong Rambrai bad ka dei kaba la mih na Nongstoiñ ban leit sha Guwahati.

U Manager jong ka, u Bah Jorlystar Myrthong na Nongstoiñ u la leit hajir ha thanad Mawlai bad u la kam ba ka la kit ïa u dewïong ba la lilam uba dei u jong u Nestingdar Nongkhlaw, uba jop ban thew ïa ka dor 8338.374 MT ha Shahlang ha West Khasi Hills.

Ki pulit ki la ïathuh ba u manager u la pyni tang ïa ka Photocopy jong ka Challan Book No. 00557 kaba don ïa u Serial No 055644 kaba la ai na ka bynta kawei pat ka kali kaba don ïa u registration number ML05-AE-1674, ryngkat bad ka aplikeshon kaba ong ba ka kali kaba don ïa u number AS01-AC-8401 ka la bujli noh ïa katei ka kali namar ba ka la mih ka jingthut.

“La bthah ïa u manager ba un pyni ïa ki kot ki sla kiba shisha (original) na ka bynta ban pynshisha. Ïa ka kali la pynkynriah noh sha Mawkyrnot Outpost, bad u dewïong ba la hap u la neh harud surok khlem da pynthut,” la ong ka kaiphod jong ki pulit.

Haba pynpaw ïa ki jingduna, ka kynhun jong ka Katakey ka la peit pyrman, “Watla u manager u la kam ba ka trok ka kit ïa u dewïong ba la die lilam, hynrei ym shym la pynmih ïa ka MTC na ka bynta ban kit ïa u dewïong ba la lilam da katei ka kali.”

Shuh shuh ka la kdew ba u manager um shym la lah ban ai ïa ka MTC ba shisha (original) la ka long na ka bynta ka ML05-AE-1674 ne AS01-AC-8401 bad ym shym la lah ban ai ruh ïa kano-kano ka kot kaba ïadei bad ka jingbujli ïa ka kali hadien ba la kynnoh ba ka la mih jingthut.

“Ka kali kaba don ïa u registration number AS01-AC-8401 ka la kit ïa u dewïong khlem ka MTC ba la pynmih da ka Directorate of Mineral Resources, ka Sorkar Meghalaya, bad kumta kumba ka paw ka la pynkheiñ ïa ka SOP kaba pynïaid ïa ka jingshalan ïa u dewïong ba la lilam,” la ong ka komiti.

Ka panel ka la bthah ban pynlong ïa ka jingtohkit kaba bniah ban pynthikna la une u dewïong u dei u dewïong uba la die lilam ne u dewïong ba la tih beaiñ bad lada la bud ne em ïa ka SOP, ha ka jingïatreilang bad ka tnad Mining and Geology bad ka Directorate of Mineral Resources.

Ka la bthah ïa ka tnad Pulit ban ai ïa ka ‘status report’ hapoh 15 sngi.