Shillong, Nailur 04
Ka ïingbishar Megha-laya High Court kala pdiang ïa ka mukotduma bala mudui da ka Jaiñtia Students’ Union (JSU) pyrshah ïa ka project tih mawshun ka Shree Cement ha East Jaiñtia Hills, kaba la pynlong ïa ka Sorkar Jylla ban pynsangeh lut shuwa ïa baroh ki kam ka kompeni.
Ka JSU ha ka sngi Thohdieng kala pyntip ba ka ïingbishar kala pdiang ïa ka jingujor ka seng kaba pyni ïa ka jingjop kaba khraw na ka bynta ki paidbah kiba shah ktah ha ka thaiñ.
“Ka ïingbishar kala pdiang ïa ka jingujor jong ngi pyrshah ïa ka Sorkar Jylla bad ka Shree Cement,” ong ka JSU haba bynrap ba ka Sorkar kala aiti ïa ka affidavit ba pynthikna ba kala pynsangeh ïa baroh ki kam jong ka kompeni.
“Ha ka jingjop kaba khraw na ka bynta u paidbah, ka Sorkar Jylla kala aiti ïa ka affidavit ba pynthikna ba kala pynsangeh lut ïa baroh ki kam jong ka Shree Cement. Ka kompeni kam lah shuh ban pynïaid ïa kino-kino ki kam tih par katba ka jingtohkit ka dang ïaid,” ong ka JSU ha ka kyrwoh bala pynlait da u Education Secretary Bocheru M Pohsnem.
Ka Jylla kala pyntip ïa ka ïingbishar ba kan thung ïa ka Fact-Finding Committee ka ban shong bishar ïa baroh ki bynta jong ka project naduh ki kam ba ïadei bad ka mariang, ka imlang sahlang, ka ain bad ki kam bymman.
Hynrei, ka JSU kala kyntait ïa kane ka sienjam bad dawa ïa ka jingtohkit ba peit thuh da ka ïingbishar.
“Ngi dawa jur ïa ka jingtohkit ba laitluid pura, ka jingtohkit ba peitthuh ka ïingbishar ban pynthikna ïa ka jingtreikam kaba shai. Ïa ka Sorkar ym lah ban shaniah ba kan pynlong ïa ka jingtohkit ka bym shah liang,” ong ka JSU.
Ka ïingbishar kan sa shong bishar ïa kane ka mukotduma ha ka 7 tarik Nailur, 2026, ban ïoh shuh shuh ïa ka jubab na ka Sorkar, ong ka JSU.
Ka JSU kala ong ruh ba ka dang pynkhreh ïa ka jubab hakhmat ka Meghalaya Human Rights Commission (MHRC), kaba la bthah ban aiti ïa ki jingai jingmut hapoh ka 28 tarik Nailur halor ka kaiphod bala aiti da ki Pulit bad ki bor district haba ïadei bad ki jingkynnoh kam thombor bad thom ïa ka jingïakhih.
Ka JSU kala kynnoh ba ka kaiphod ka dei ka bym shai bad kaba ïaid lait ïa kiei-kiei baroh bad ki kot ki sla jong ki Pulit hi ki kubur ïa ka jingthombor ïa ka kynhun medical ba wan ai jingïarap da ki briew ba kiengatiar.
