Nongpoh, Nailur 04
Ki bor pynïaid district ka Ri Bhoi ha ka sngi Thohdieng kila pynmih da ka hukum ban pynbna ba ki jaka na kad liengsuiñ ha Umroi ter ter haduh Umiam yn nym shah ban pynher ïa ki Drone, ki Unmanned Aerial Vehicle (UAV), ki Remotely Piloted Aircraft (RPA) bad kiwei de ki jaid tiar ba ïasyriem namar ka jingwan iuh kjat u Vice President ka ri, u C.P. Radhakrishan sha nongbah Shillong ha ka 7 bad 8 tarik mynta u bnai Nailur.
Katei ka hukum kaba la soi da u Dr. Abhishek Saini, Deputy Commissioner ka District katkum ka kyndon 163 jong ka Bharatiya Nagarik Suraksha Sanhita (BNSS), 2023 ka dei na ka bynta ka jingshngaiñ jong ki heh ki hain lane kita ki VIP ki ban wan lyngba ka kad liengsuiñ ha Umroi bad ïaid lyngba ka Umiam ban poi sha nongbah Shillong.
Katei ka hukum kan treikam mardor tad ha kitei ki ar sngi, kata ka 7 bad 8 tarik jong u bnai Nailur ha kaba yn nym shah satia ïano-ïano ban pynher ïa ki Drone, UAV bad RPA ha kitei ki jaka bad kiba lah ban pynher ruh ki dei tang kiba la ïoh jingbit ryngkat ka jingthoh na ki bor ba dei khmih.
