Shillong, Nailur 06
U kyrtong ka National People’s Party (NPP) sha ka Shillong Lok Sabha, u Dr. D.R.L. Nonglait u la ong ba dei tang ka Sorkar MDA ba la ïalam da ka NPP kaba la nud ban mynjur ïa ka rai hapoh Ïingdorbar Thawaiñ ban pyrshah ïa ka jingtih ‘Uranium’, kaba long ka mat sngewkhia kaba khraw na ka bynta ka West Khasi Hills.
Haba kren ha ka jingïalang ïalap ilekshon ha Maweit kaba hap hapoh Mawshynrut konstitwensi ha ka Sngi Saitjaiñ, u Dr. Nonglait u la ong, “Kawei kaba ka West Khasi Hills ka sheptieng eh ka dei ka jingpyrshang ban tih ‘Uranium’. U Bah Hoping u ju ong, lada phi tih ïa u ‘Uranium’, tih shuwa ïa ka dohnud jong nga, hynrei ym don Sorkar kaba shim ïa ka rai hapoh Ïingdorbar ne ‘Resolution’. Ka dei kane ka Sorkar jong ka NPP.”
U la ong ba kane kajuh hi ka Sorkar ka la shim ïa ki rai kiba shlur halor ka ktien Khasi bad ILP.
“Ngi la dawa pynrung Khyrnit ba 8 na ka bynta ka Khasi la bun-bun snem, hynrei dei kane ka Sorkar MDA kaba la ïalam da ka NPP kaba la nud ban shim ïa ka ‘Resolution’. Na ka bynta ka ILP ruh bad ban pynlong ïa ka Khasi kum ka ktien Sorkar, dei kane ka Sorkar,” u la ong.
Haba pynrem ïa ki jingkynnoh jong ka Liang Pyrshah ba ka Sorkar kam treikam, u Dr. Nonglait u la ong, “Ki ong ba kane ka dei ka Sorkar kaba khlem treikam, ka bym sngap ïa ki paidbah. Kata kam dei kaba shisha.”
U la kdew ïa ki kam pynroi ha kylleng ka thaiñ kum ka jingpynshisha.
“Ngi don ïa ka C&RD Block ha Shallang kaba la plie ha u snem 2022, ha Nonglang ruh ka don ka Block nalor ki skhim kiba bun. Ka surok Nongstoiñ-Rambrai-Kyrshai mynta ka la bha shibun bad dei kane ka Sorkar kaba la wanrah ïa ka,” u la ong.
U la ong ba dei kane ka ‘Track Record’ kaba la pynlong ïa u balei ban jied ïa ka NPP.
“Nga ïeng ha kane ka rynsan saiñ pyrthei hadien ba la buh ïa ka nongrim kaba skhem, hadien ba nga la thew la woh ïa ka. Balei nga ïatreilang bad kane ka seng? Namarba nga ïohi ba kane ka seng ka leh ïa ki kam kiba bha,” u la ong.
