Shillong, Nailur 06
U Bah Paul Lyngdoh uba dei u Nongïalam ka United Democratic Party (UDP) u la ong ba ka UDP kala nang ngam hadien ka jingshah weng noh jong u na ka Kynhun Myntri ka Sorkar Jylla.
Kane ka jingkynthoh ka jong u, kala mih hapdeng ki jingmih ki khubor ba ki don haduh 9 ngut napdeng ki 12 ngut ki MLA ka UDP kiba la pynkhreh ban leit ïasoh noh sha ka Bharatiya Janata Party (BJP).
“Kumba nga la ong ha kato kawei ka sngi, bun ki MLA kila ïakren bad ki nongïalam ba hakhlieh ka BJP. Kane ka pyni ba ym kiei kiei kiba ïaid beit ïaid ryntih hapoh ka UDP,” ong u Bah Paul uba dei ruh u MLA ka West Shillong Constituency.
U Bah Paul uba dei ruh u Myntri Sorkar barim u la ong, ki MLA ka UDP ki bunkam bha ha ki kam pynroi ha ka por ba u dang bat ïa ka shuki Myntri.
“Ha ka por ba nga dang don ha ka Kynhun Myntri, nga la pyrshang kat kaba nga lah ban trei. Kane ka mut ruh ba ki MLA ka UDP ruh ki ïa bunkam lang bad bun ki projek bad ki skhim la wanrah ha ki constituency jong ki. Hadien kane, phi ïatip lut ïa kaei kaba jia,” u la ong.
U Bah Paul u la bynrap, “Kan long kaba bakla na ka liang jong nga ban ïaroh ïalade, hynrei kaei kaba jia mynta ka pyni ïa ka kyrdan kaba ka seng kala sdang ban ngam”.
U ong ba ka long shisha kaba sngewsih ban ïohi ïa ka lawei jong ka seng kaba la kha na ka jingïakhih Hill State.
“Kum u champion ba don ïa ka mynsiem riewlum, nga shem ba ka long kaba sngewsih shibun ba ka UDP kaba ha ki por kiba la leit kaba la ïasoh bad ka jingïakhih Hill State, mynta ka la sdang ïakynduh bad don ha ka bynta ban duh bad hiar noh sha ka jingdon tang uwei ne ar ngut ki MLA. Ngam kwah ban kynnoh ïano ïano ruh halor ka jinghiar ka UDP,” u la ong.
Haba kylli la ka UDP ka donkam da u nongïalam ba thymmai, u la ong, “Ïa kata ka bynta ban eksamin ne tohkit ka dei ban mih na ki fourth estate (lad pathai khubor). Kum ha kane ka prokram jong ka Langsning FC, u rangïalehkai um lah ban batai ïa ka rukom ïalehkai jong u. Dei u coach bad ki nongpeitkai kiba lah ban bishar ïa ka jingtbit jong uwei pa uwei u rangïalehkai,” u la bynrap.
