Shillong Nailur 06
U National Vice President ka NPP uba dei ruh u Symbud Myntri Rangbah ka Jylla u Bah Sniawbhalang Dhar ha ka sngi Thohdieng u la pan jingkyrshan paidbah na ka bynta u kyrtong ka NPP u Dr. DRL Nonglait ha ka ilekshon Shillong Lok Sabha shiteng samoi da kaba pynpaw ba u MP na ka liang synshar un long ka jingmyntoi ïa ka Jylla.
Haba kren ha ka jingïalap ilekshon ha Mawryngkneng, u Bah Dhar u la ong ba u Dr. Nonglait u la ïalap ilekshon ha baroh 36 tylli ki Assembly konstitwensi ha kine ki saw bnai ba la dep bad u ïoh ïa ka jingkyrshan kaba bha.
“La saw bnai mynta u Dr. Nonglait u la pyrshang ban ïalap ilekshon ha baroh 36 tylli ki konstitwensi, kaba sngewkmen ka long ba ki briew ki ong mynta ka NPP ka la ïoh ïa u kyrtong uba bha,” u la ong.
Haba batai ïa u Dr. Nonglait kum uba la tbit tam ban mihkhmat ïa ka Meghalaya ha Parliament, u Bah Dhar u la ong, “U bat 9-10 degree bad kumta u long uba bit tam ban mihkhmat ïa ngi ha Parliament.”
U Bah Dhar u la ong ba ka ilekshon ban wan ka long kaba kongsan bha na ka bynta ka Jylla.
“Kane ka ilekshon ban wan ka long kaba kongsan bha, lada ngi ïoh ïa u MP na ka liang ka Sorkar kan long ka jingmyntoi ïa ka Jylla jong ngi,” u la ong bad bynrap, “Nga kyrpad ïa baroh ban ai ka jingkyrshan ïa u Dr. Nonglait, ba un long u nongïalam jong ngi sha Delhi.”
“Lada ngi ïoh MP na kawei ka ïing, Myntri Rangbah na kawei pat ka ïing, ngi shu bunkam ban ïaleh, ym don por ban trei,” la ong u Bah Dhar, da kaba shim ïa ka swipe ha u MP ka Liang Pyrshah.
Haba pynpaw ïa ki kam jong ka Sorkar MDA, u Bah Dhar u la ong ba ka mang tyngka jong ka Jylla ka la kiew na ka 9 hajar klur ha u snem 2018 sha ka 30 hajar klur ha ki 8 snem.
“Ha ki kam ïalehkai, ha u snem 2018 ka mang tyngka kam shym la palat ïa ka 80 klur tyngka, naduh ba la wan ka NPP kaba duna tam ka long 1000 klur tyngka ha ka shisnem. Ka madan phutbol kaba heh tam ha India ka dei ha Mawkhanu kaba long 732 klur tyngka,” u la ong.
U la kdew ïa ka surok Greenfield four-lane kaba shongdor T.27,000 klur na Ri-Bhoi sha Rattacherra bad ong ba palat 3,000 km ka jingpynheh surok bad 1,700 km ki surok thymmai la shna tang na ka State Plan.
U la ong ruh ba da ki hajar kilomiter ki surok la ai jingbit da ka Sorkar India.
Haba ïadei bad ka koit ka khiah, u Bah Dhar u la ong ba ka jingïap jong ki khyllung ba dang kha ka la duna bha ha ki 8 snem lyngba ka CM Motherhood Scheme bad katto katne ki CHC bad ki PHC la kyntiew kyrdan.
Halor ka bha ka miat jong ki samla, u la ong ba ka kynhun myntri ka la rai ban pynduh noh ïa ka interview na ka bynta ki kam Grade C bad D naduh u snem 2027.
U Bah Dhar u la pynkynmaw ruh ba dang shen ka Assembly ka la mynjur ïa ka Resolution kaba pyrshah ïa ka jingtih Uranium hadien 54 snem bad ai kyrdan Sorkar ïa ka ktien Khasi hadien 53 snem.
“Leit sha ki 60 tylli ki konstitwensi, ka Sorkar NPP kam ju niew beiñ ïano ïano ha ka liang ka roi ka par,” u la ong.
