Khliehriat, Nailur 06
Ka District School Education Officer (DSEO), East Jaiñtia Hills District ha ka 5 tarik Nailur kala rakhe ïa ka sngi kyrpang jong ki nonghikai kaba tip kum ka 65th Teachers Day ha ka jingïalang kaba la long ha Khliehriat Higher Secondary School, Khliehriat.
Ha kane la sngi la donlang ruh u Deputy Commissioner, East Jaiñtia Hills District Manish Kumar, IAS kum u kongsan, u District School Education Officer (DSEO), u Bah R. Diengdoh, Sub-Divisional School Education Officer (SDSEO), East Jaiñtia Hills District, Bah Onikson Sumer, nalor kiwei kiwei.
U DC Manish Kumar, IAS, haba ai jingkren u la pynpaw ïa ka jingsngew sarong ban don bynta lang ha ka jingrakhe ïa ka sngi kyrpang jong ki nonghikai. U la ai khublei ïa ka jingtrei shitom, bad ka jingaiti lut jong ki nonghikai ha kaba shakri ïa ka imlang sahlang.
U Manish Kumar u la ong ba ka bynta jong ki nonghikai ka ïaid shabar u pud u sam jong ki skul bad ki kamra klas, namar bunsien ki long kum ki kmie ki kpa ba ar, ki nonghikai bad ki nongpynïaid ïa ka jingim jong ki khynnah skul jong ki.
Haba pynkynmaw ïa la ki jong ki jingshem kum u samla pule, u la ong ba ïa ki nonghikai la kynmaw ym tang na ka bynta ki jinghikai ba la hikai na ki kot pule, hynrei na ka bynta ki jinglong ba ki pynrung ha ki khynnah skul, ïa ka jingsngewrit, ka jingshlur, ka jingaiti bad kaba kongsan tam, ka jinglong bad ka akor.
Da kaba ki khynnah skul ki lah ban ïoh ïa ki jingtip kiba bun, u Kumar la ong ba ki nonghikai ki don ka kamram kaba kongsan ban ïalam ïa ki khynnah skul ha kaba pynïapher ïa ki jingshisha na ki khubor lamler, ban pynkylla ïa ka jingtip sha ka jingstad bad ban pyndonkam ïa kata ka jingstad na ka bynta ka jingbha jingmiat jong ka imlang sahlang.
U la kyntu ruh ïa ki nonghikai ba kim dei ban long ka bynta jong ki tang ha ki kot pule bad hapoh ki kamra klas hynrei ban long ki nongpynroi ïa ka jingmut jingpyrkhat bad ka jinglong nongshong shnong kaba don ka jingkitkhlieh hapdeng ki khynnah skul.
U Kumar u la ban jur ruh halor ka jingdonkam jong ki jingthrang jingangnud ha ka jingim jong ki samla pule. U la pynpaw ba ka jingthmu jong ka jingpule kam dei tang ban tei ïa ki kam hynrei ban pynroi ruh ïa ka jinglong briew bad ban thaw ïa ka jingsngew ba don jingthmu bad jingkmen ha ka jingim.
U la pynshlur ïa ki nonghikai ban pynrung ïa ka jingangnud bad jingshaniah ha ki khynnah skul bad kyntu ruh ïa ki khynnah skul ban long ki khynnah kiba trei shitom ban pynurlong ïa ki jingangnud jong ki.
Haba kren halor ki jingeh kiba ki samla ki ïakynduh ha kane ka juk mynta khamtam ka jingdih drok bad ka jingpep skul, u DC u la kyntu ïa ki nonghikai bad ki khynnah skul ba kin sngewthuh ïa ki jingma kiba sniew kiba mih na kum kine ki jingeh bad ban ïatreilang ban weng ïa ki.
U la khot ïa ki nonghikai, ki khynnah skul, ki longïing bad ka imlang sahlang ban ïatreilang ban weng ïa ki jingeh ba ki samla ki ïakynduh bad ban noh synniang sha ka jingtei ïa ka imlang sahlang kaba suk, kaba koit ba khiah bad kaba don ka jingkitkhlieh.
Ha kane ka prokram, la sam ruh ïa ka khusnam District Award kum ka jingithuh halor u synniang u bynhei ba ki nonghikai kila noh ha ka liang ka pule puthi.
Ki nonghikai kiba la ïoh pdiang ïa kane ka khusnam ki long u Principal, Topcem Public School, Campus Meghalaya Cement Ltd Sumant Kumar, bad Head Teacher, Khliehriat West Government L.P. School, Kong Nazariness Nongtdu.
Ha kane ka prokram la don ruh ki jingshad tynrai bad ki jingrwai ba la shim bynta da ki khynnah skul na ki skul bapher bapher ha kylleng ka East Jaiñtia Hills District.
