Shillong, Nailur 06
Ka Kong Arena Hynniewta kaba dei ka President ka BJP Mahila Morcha Meghalaya State Unit kaba dei ruh ka kyrtong MLA ha ka ilekshon na Shella constituency ha u 2023 ka la ong ba kaei kaba ki nongïalam BJP na Delhi ki shim ïa ka rai, ka pdiang beit lada u MLA ka UDP ba mynta un wan rung sha ka BJP.
Haba ïakren bad ka Kong Arena ka la ïathuh ba ha kine ki sngi ka la bna ïa kane ka khubor ba ki MLA ka UDP bad u MLA ka Shella constituency Bah Balajied Synrem un rung noh sha ka BJP hynrei haduh mynta ym pat lah ban pynthikna.
Ka la ong ba lada u Bah Balajied un wan rung sha ka BJP kan nym mih na ka BJP hynrei kan trei beit ïa kane ka seng kumba ka la angnud naduh basdang namar ka sngew shaniah ïa u Narendra Modi uba la ïarap ïa ki paidbah kiba duk basuk.
Haba kylli la kan dang pynkhreh ne em ïa ka ilekshon ha u 2028 na Shella Constituency, ka Kong Arena ka la ong ba ka shong ha ki nongkyrshan lada ki kwah ban ïeng, kan ïeng biang namar ka dang angnud ban shakri ïa ki paidbah kum ka longkmie.
Haba kylli, haba phi pynkhreh kumta ïa ka ilekshon phin ïakhun beit na ka BJP ne kumno lada jia ba wan rung u MLA ba mynta Bah Balajied, ka la ong biang ba ka shong ha ka rai jong ki nongïalam ka BJP na Delhi.
Kumban shu pynkynmaw ka khubor ha kine ki sngi ka la mih ba ki khyndai ngut ki MLA ka UDP kin rung noh sha ka BJP kaba bat ïa ka bor synshar ha Delhi bad 2 ngut kin rung sha ka NPP.
Napdeng kine ki 9 ngut ki MLA ka UDP la kynthuplang ïa u MLA ka Shella constituency Bah Balajied Synrem uba dei u khun jong u Dr. Donkupar Roy (bam kwai ha dwar U Blei) uba la long kum President ka UDP bad Myntri Rangbah barim ka jylla.
