Shillong, Nailur 06
U Bah Martle N. Mukhim u ba long u nongïalam seng riewlum ba la rim bha bad uba long ruh u MLA & MDC barim ka Mawkynrew Constituency u la pynpaw ba u don hapdeng ka jingduh jingkyrmen haba peit ïa ka jinglong jingman jong ka saiñpyrthei ha ka Jylla bad ki sengsaiñ hima trai ri.
“Nga don ha kata ka jingduh jingkyrmen kaba shyrkhei bha, kata ka jingduh jingkyrmen jong nga ka long kaba noh shilliang, ba nga ong noh shilliang ka mut ba nga ju pyrkhat ba ki seng rilum ki dei hi na bynta ka jaidbynriew jong lajong” la ong u Bah Martle haba kren sha ki nongthoh khubor ha ka Sngi Saitjaiñ.
Shuh-shuh u Bah Martle u la ong, “Kumba ka long mynta pat, ka lyer ba mih sha madan i kumba kine ki seng riewlum ki lah ban ym don shuh, ha nga shimet lei nga sngew kumba nga don ha ki sla dieng”
Haba twat jingmut haba ïadei ka jinghiar arsud ki seng ri lum, kum ka UDP kaba la long ka seng ri lum kaba khlaiñ bad kaba don bun ngut ki MLA ha ïingdorbar thawaiñ, u Bah Martle u la pynpaw ba lada ka long kumno kumno ruh dei hi ban ïaid shakhmat bad ha kata ka jingïaid dei ban weng ïa ki jingeh kiba ktah ïa ka Ri bad ka jaidbynriew.
Katkum ka jong ong u Bah Martle, “Ymdon shuh da uwei pat hapoh ka UDP, lada jia ba kine ki 9 ngut kin mih noh, kaba mut ka UDP ka la sah tlot sah swai bad kumba nga ong mynne ïa nga shi met nga la duh jingkyrmen ïa ka jinglong jingman jong ki seng ri lum lane seng trai ri” ha kaba u la bynrap ba kumba ka long mynta kan ym don shuh ka jingshaniah ha ki seng trai ri.
