Shillong, Nailur 06
U nongmihkhmat barim ka Mawkynrew Constituency u Bah Martle N Mukhim u la pynpaw ba un ym pat shnongthait satia na ka kam sengsaiñ pyrthei bad pynpaw ba u sngewkhia ïa ka saiñ hima sima ha kine ki sngi bnamar ba u la heh la san ha ka kam shakri paidbah naduh ka por ba u dang khynnah.
Haba kren sha ki nongthoh khubor u haba ïadei ka jingpynkhreh jongu ha ki ilekshon ha ki snem ban sa wan, u la ïathuh ba ha ka jingim jongu, u la long lypa u ba pynkhreh ban shakhri khlem shongthait ïa ki paidbah.
U la ong haba phai haba ïadei ka jingkoit jingkhiah, u la ïathuh ba ka met kam ailad shuh, kiba ha ïing ha sem jong u ruh ki la ong ba un shongthait noh na ka kam shakri paidbah, hynrei ha ka mynsiem, ha ka jingsngew jongu, u sngew ba ym pat biang satia ban leh kumta.
Haba ïadei ka jingbym ïakhun jong u ha ka ilekshon MDC ba la dep, u Bah Martle u la pynshai ba u don hapdeng ka met ka bym shait bym koit, hynrei u la pynpaw ba ki paidbah nongkyrshan jong u ki dang pynbor ïa u ban ïakhun ha ka ilekshon ha kato ka por, “Ha kane ka MDC kaba la dep, ki nongkyrshan ki ong long katba long Maheh, phi ai tang ka kyrteng ngin ïaleh ma ngi, hynrei nga sngew hapdeng ka jingpang jingshitom kaba khia ka long kaba eh ba ngan ïakhun” u la ong.
U la bynrap ba u don hapdeng ka jinglynnga jingpisa mynsiem haba peit ïa ka jinglong jingman ka jinghiar ka rukom synshar khadar hapoh ka jaidbynriew, kaba la pynlong ïa u ban pyrkhat ban thaw ïa ka kynhun ba la tip kum ka Political Affair Committee hapoh ka Mawkynrew Constituency kum ka jingsdang ban pynsngewthuh paidbah shaphang ka jingdonkam bad ka jingkordor jong ka synshar paidbah ha ka Ri Khasi bad ha ka Ri India baroh kawei.
