Nongpoh, Nailur 07
Ha kawei ka jingjia ba shyrkhei, uwei u rangbah u la ngat ha ka jingmynsaw jur bad ym tip briew shuh hadien ka jingshah mait ha la ka lok da u sdie haduh saw sien kynthih ha 9 Mer Baridua, Ri Bhoi District.
Katkum ka khubor ba la ïoh lum, la ïathuh ba katei ka jingjia ka dei hynnin ka janmiet, kata ka 6 tarik u Nailur katba utei u lok u dang wanrah doh ban shet ha ïing, hynrei kala mih pynban ka jingïamai ïania hapdeng kitei ki shijur.
La ïathuh ruh ba hadien katei ka jingïania, katei ka lok kaba la tip kyrteng kum ka Poonam Bosper, ka la leit ban shet maggie bad utei u lok pat u la shong ban peit TV. Hynrei kynsan-kynsan, katei ka lok kala shim da u sdie bad mait ïa la u lok haduh saw sien kynthih bad leit bret ïa u sdie mar jan ïing hashwa ba kan mih ban phet ïalade.
Na ka liang ki paidbah nongshong shnong kiba la ïoh jingtip ïa katei ka jingjia ki la ïoh ban bat noh ïa katei ka briew katba ka dang ïaid lynti bad tian bishar noh ïa ka hashwa ba kin aiti sha ki bor pulit ka thanad Khanapara na ka bynta ban leh ïa ka bynta katkum ki kyndon jong ka aiñ. Ha kaba ïadei bad kane ka jingjia, u Bah Ioanis Narleng, Rangbah Shnong ka 9 Mer Baridua u la pynpaw ïa ka jingpynrem jur halor katei ka kam kaba la pynkyndit ïa ki nongshong shnong baroh. U la kyntu ruh ïa ki bor pulit ba kin ai ïa ka jingpynshitom kaba tyngeh.
