Shillong, Nailur 07
Ha ka janmiet 05 tarik u Nailur, 2026, na ka jingïohi ïa ar tylli ki kali kiba hiar sha ki bynta ka Borhil, surok Lyngkhat sha Dawki, khappud bad ka Ri Bangladesh, bad tang shiphang ki la phai noh, ka la pynlong ïa ki katto-katne ki samla ban phone ïa ki para samla ka shnong Nongtyngur bad phah bat ïa kitei ki kali.
Ka jingphah bat ïa kitei ki kali, kadei namar ka jingsuba jur ba kidei ki kali kiba wan shaw ïa ki Bangladeshi kiba rung tuh sha India.
Haba la bat ïa kitei ki kali, la shem ba ki don haduh 9 ngut ki suba Bangladeshi bad ki briew kiba wan shaw pat ki kynthup ïa ar ngut ki nongñiah kali tourist- u wei na Assam bad u wei na Laitumkhrah, uba wallam lang ïa ka lok bad ar ngut ki khun, ha kaba u wei na ki u dei uba dangrit bad kiba dei ruh kiwei ki jaidbynriew bar Jylla.
Katei ka kali kali ba ñiah da u briew na Assam, ka don ïa u Registration Number AS 01 JC 7449 bad kawei pat kadei kaba ñiah da u ba sah ha Laitumkhrah, kadei kaba don ïa u Registration Number ML 05 P 3212.
Ki samla shnong ki la tohkit ïa kitei ki briew bad kim lah satia ban sei ïa ki kot ki sla, kaba la pynsuba ba ki dei beit ki Bangladeshi.
Shuh-shuh ka lok jong u nongñiah kali tourist uba sah ha Laitumkhrah ka la ïakren bad ki samla katei ka shnong da ka ktien Khasi bad kyrpad pyllait ïa ki bad la kynnoh ba ka tyrwa da ka pisa.
Nalorkane, la kynnoh ba kine ki nongwan shaw kidei kiba la buaid kyiad, hynrei ki samla shnong kim ailad satia bad pyntip sha ki bor pulit ka Pynursla Police Station. Ki bor pulit ki la wanpoi ha ka por kumba 10 duna eiei bad rah noh ïa kitei ki kali bad ki briew sha thanad bad pynlong ka jingtohkit.
Ki samla na katei ka shnong ki la pynpaw, ba kane kam dei ka sien nyngkong ba kum kine ki kam ki jia ha ki thaiñ khappud, hynrei kadei ka jingjia kaba la ju ïai paw na ka por sha ka bor bad kyntu ïa ki bor ba dei peit ban shim khia mardor.
