Shillong, Nailur 07
Ka jingshakri ki nos ha North Eastern Indira Gandhi Regional Institute of Health & Medical Sciences (NEIGRIHMS) la khmih lynti ba kan shah ktah jur bha da ka jingrai ka NEIGRIHMS Nurses Association ban shim shuti paidbah ha ka 9 tarik Nailur, bad pynbud da ka jingïakhih ba khlem pud naduh ka 17 tarik Nailur.
Ka Association kala pyntip ba ïa kane ka sienjam kala wan jia hadien ka jingbym leh eiei ki bor pynïaid ïa ki jingdawa ba la sahteng la slem bha wat hapdeng ki jingthoh ba bun sien.
Ha ka kyrwoh, ka NNA kala buh ïa saw tylli ki mat jingdawa, ka jingthungkam pura ha baroh ki sanction post ba lait thylli jong ki Nursing Officer, weng noh ïa ka jingtyrwa ban shim ïa ki Nursing Officer nabar, pyntreikam ïa ka Office Memorandum ka Health Ministry ba 30 tarik Jymmang, 2026 bad pynlong noh kloi ïa ki eksam thungkam ba sahteng.
Ka Association ka ong ba kala dep ban pynlong ïa ka jingiakhih ba malu mala ban shu pyni dak, kynthup ka jingdeng ïa ki badge rong iong naduh ka 17 tarik Nailar bad pynlong ïa ka dharna ba man ka sngi naduh ka 18 tarik Nailar haduh 21 tarik Nailar.
Ka rally kaba la buh ban long ha ka 21 tarik Nailar la pynsangeh noh namar ka jingpynjari ia ka kyndon 163 jong ka BNSS.
Ka ïathuh ba ïa ka jingïalang la pynlong ha ka 19 tarik Nailar bad u Myntri ka Tnad ka Koit ka Khiah ka Jylla Bah Wailadmiki Shylla bad Director Prof. Nalin Mehta, hynrei ym shym la ai satia ïa kano-kano ka jingkular.
Ka NNA kala ai ïa ka notice ba 14 sngi ban shim da ka shuthi paidbah bad kan pynïaid shakhmat bad ka jingïakhih kumba la rai.
