Shillong, Nailur 07
Na ka jingïaid ki khubor ba ka don ka jingor-pait ha ka National People’s Party (NPP), kaba lam khmat ïa ka Sorkar MDA-II, u Bah Sniawbhalang Dhar uba long u Nongïalam ka NPP bad ruh u Symbud Myntri Rangbah ka Jylla ha ka janmiet ka sngi Nyngkong u la pynshai ba kam don satia ka jingïakynad hapdeng ki MLA ka seng.
“Ngi long skhem bad tylli kum kawei ka ïing bad kaba suk ba saiñ,” ong u Bah Sniawbhalang haba kren sha ki lad pathai khubor.
Kum ban shu kdew ba hapdeng ki khubor ba don 8 haduh 9 ngut ki MLA na ka UDP kiba thmu pynïasoh noh sha ka BJP, ki la mih ruh ki jingïakren ba don ka kynhun na ka NPP kiba kwah ban pynïasoh lang noh sha ka BJP.
U Bah Sniawbhalang u la kyntait mardor ïa ki jingkynnoh ba ki don ki MLA ka NPP kiba thmu leit pynïasoh sha ka BJP, da kaba pynpaw ba ka seng ka long kawei hapoh ka jingïalam jong u Conrad K Sangma.
U Bah Sniawbhalang u la kdew ba ki jingkynnoh ki long kiba bakla bad tang ki jingpynphriang khubor na kiwei ki seng saiñpyrthei.
“Ngi hapoh ka NPP ngi long ka longïing kaba kmen. Kam don satia kano-kano ka jingkhih, ka jingïakren bad ka BJP. Kam don satia kano-kano ka jingma,” u la ong.
“Hapoh ka NPP, ym don tang uwei ruh u MLA uba don kum kata ka jingthmu. Ngam shym la kren tang kum u Symbud Myntri Rangbah, nga kren ruh kum u nongïalam ka NPP, nga tip bha ïa ka jinglong bad ka jingkwah jong ki MLA,” u la ong.
Ha kaba ïadei bad ka ilekshon MLA ha u 2028, u Bah Sniawbhalang u la ïathuh lypa ba ka NPP kan tam palat ïa ki 33 ngut ki MLA bad kane kan dei namar ki kam ba ka la trei bad ong ruh ba kum ka seng kan bteng ban burom ïa ki paralok ba ïatreilang.
U la ong ba ka NPP ka khlem leh donbor ïa ka UDP watla ka don ïa ka number ki MLA kaba long 33 ngut. Ka NPP ka dei ka seng kaba burom lut ïa baroh ki paralok kiba ïatreilang.
U Bah Sniawbhalang u la ong, “Ka UDP ka ïoh ïa ka jingleh bha kaba biang tam na ka NPP, naduh ka sngi nyngkong ngi la leh bha ïa ki, nalor ba ngi don 33 ngut ki MLA, ngi khlem beh ne leh arsap ïa ki.”
Haba kylli halor ki khubor hamsaïa ba ka don ka jingthmu ba un shimti noh kum u Myntri Rangbah lada ki MLA ka UDP kin leit ban pynïasoh noh bad ka BJP, u Bah Sniawbhalang u la kyntait ïa kane ka khubor bad ong ba kam don eiei kaba kum kata. Haba ïadei bad ka khubor ba ka don ka jingthmu ban pynhiar shuki noh ïa u Symbud Myntri Rangbah ka Jylla u Bah Prestone Tynsong, na ka liang u Bah Sniawbhalang Dhar u la kyntait bad ong ruh ba kam don kum kata, ki Myntri ka Sorkar Jylla kin neh haduh ba kut bad kin bteng ruh ban synshar ha u snem 2028.
Haba kylli hato ka don ne em ka jingma ïa ka NPP lada rung BJP ki MLA ka UDP, u Bah Sniawbhalang u la ong ba kam don jingma satia ïa ka NPP.
Haba kylli pat halor ki MLA ka UDP kiba thmu leit pynïasoh BJP, u Bah Sniawbhalang u la ong, ba um don eiei ban kynthoh ne kren ïa ka kam ïing jong kiwei. U la ong ba ym dei ba ki MLA ka UDP ki shah khot ha ka BJP hynrei ka dei ba ki kwah hi ban leit bad haba kylli kumno u don jingtip halor kane, u Bah Sniawbhalang u la ïathuh ba ki don ki paralok MLA ka UDP kiba ïathuh ha u.
