Shillong, Nailur 08
U Chief Electoral Officer (CEO) ka Jylla, Dr. B.D.R. Tiwari ha ka Sngi Ba-ar u la ong ba ki don haduh 384 ngut ki nongthep ‘vote’ kiba la shah pynbna kum ki bym lah shuh ban thep ‘vote’ hadien ka jingkhmih bniah bad ka ‘Hearing’ jong ka Special Intensive Revision (SIR), 2026 kaba dang ïaid shakhmat.
“Haduh mynta, la lap ba 384 ngut ki nongthep ‘vote’ kim ïoh shuh ban thep ‘vote’ hadien ka jingkhmih bniah bad ka rukom bishar ba la buh lyngba ka ‘Hearing’,” la ong u CEO haba khmih bniah ïa ka jingïaid shakhmat jong ka SIR, 2026 bad ki ophisar ilekshon jong ki distrik bad ki seng saiñ pyrthei lyngba ka ‘video conference’.
U Dr. Tiwari u la pynshai ba ka jingïoh pdiang ïa ka jingpynbna kam mut satia ba yn pyndam noh mardor na ka ‘Electoral Roll’.
“Ka jingpynbna ka ai lad ïa u nongjied ban pynshai ïa ka jingbym ïahap bad ban pynbiang ïa ki kot ki sla ba la buh bad ba ïadei bad kane ka bynta,” u la ong, da kaba bthah ba ym dei ban pyndam ïa kano-kano ka kyrteng kaba paw ha ka ‘Draft Roll’ khlem ka jingpynbeit kaba biang, ka jingtohkit bad ka lad kaba shong hok ha ka liang ka ‘Hearing’.
Haba ai ïa ki jingtip kiba bniah, u CEO u la ong ba na ki 21,69,243 ngut ki nongthep ‘vote’ ha ka ‘Draft Electoral Roll’, la pynmih 6,51,735 tylli ki jingpynbna, ha kaba 6,20,730 tylli la dep ban pynpoi, katba 31,005 tylli ki dang sahteng ban pynpoi. Haduh 2,08,870 tylli ki ‘Hearing’ la pynlong, kaba pyni ïa 32.05% na ki jingpynbna ba la pynmih.
U Dr. Tiwari u la ïathuh ba ki don 2,22,786 ngut ki nongthep ‘vote’ kiba la pynithuh hapoh ka thup “No Mapping” bad 4,28,949 kiba don ka jingbym biang ha ka ‘Mapping’, bad baroh ki don 6,51,735 ngut ki nongthep ‘vote’ kiba la pynithuh na ka bynta ka jingkhmih bniah.
U la pyntip ruh ba la ïoh pdiang haduh 12,951 tylli ki aplikeshon hadien ba la pynmih ïa ka ‘Draft Roll’, ba kynthup ïa 6,804 tylli ki ‘Form 6’ na ka bynta ka jingpynrung kyrteng.
Ha kawei ka liang, la thung ïa 1,814 ngut ki Booth Level Agent (BLA) da ki seng saiñ pyrthei – 736 ngut da ka NPP, 393 ngut da ka BJP, 320 ngut da ka VPP, 186 ngut da ka INC, 121 ngut da ka UDP bad 58 ngut da ka AITC. Namar ka jingkulmar kaba la jia ha u bnai ba la dep ha Shillong, la pynjlan ïa ka SIR da 14 sngi.
Ka tarik ba khatduh ban pynsngew halor ki ‘Claims & Objectives’ mynta kan dei ha ka 18 tarik u Nailur, ka tarik ba khatduh ban pynbeit ïa ki jingkam/’Hearing’ kan dei ka 17 tarik u Risaw, bad ka jingpynmih paidbah kaba khatduh ïa ka ‘Electoral Roll’ kan long ha ka 21 tarik u Risaw, la bynrap u CEO.
