Shillong, Nailur 08
U President ka Congress ha Meghalaya Bah Vincent H Pala ha ka sngi Nyngkong u la batai ïa ka khubor ki 9 ngut ki MLA ka UDP kiba thmu pynïasoh sha ka BJP, kum ka “drama” kaba la shna da ka NPP bad ka BJP ban pynkut noh ïa ki seng riewlum.
“Tang ynda la kut ka drama phin sa tip mano ba dei u aktor, mano ba dei u ‘angel’ bad mano ba dei u ksuid,” la ong u Bah Pala haba pynïanujor ïa ka jinglong jingman jong ka saiñpyrthei bad ki drama skul ha ka por ba rakhe ïa ka sngi ki nonghikai.
U la kynnoh ba la don u ‘actor’ uba dang pynïaid ïa ka jingïakren bad jingpynbeit ha Delhi da kaba die ïa ki aktor kiba rit ha Meghalaya.
“Don u aktor sha lyndet jong kane uba la pynlong ïa ki ban leit ïa pynbeit sha Delhi.
Kito kiba pynshit hangne ki dei ki briew jong u Conrad,” kam u Bah Pala.
U Bah Pala u la ong ba ka NPP bad ka BJP ki dei ki ar bynta jong kajuh ka pisa bad ryngkat lang ki thmu ban pynjem khnap ïa ki seng riewlum.
“Pynkylla ïa ka BJP sha ka NPP, kawei ka wan ha ka ktien phareng bad kawei ha ka ktien Hindi. Ïa kawei ka liang la ïalehkai da ka NPP bad ïa kawei pat da ka BJP,” u la ong bad bynrap ba ka jingthmu pynïasoh kan nym ktah ïa ka Sorkar MDA namar ba baroh ar tylli ki party ki dei kajuh.
U la ai nuksa ïa ka Shiv Sena bad ka NCP, da kaba ong ba ïa kajuh ka buit la pyndonkam ban nguid ïa ka UDP.
“Kane ka dei ka jingïalehkai lang hapdeng ka NPP bad ka BJP. Kham mynshwa haba shah thied ki MLA ka Congress, la treikam da ka NPP hynrei ka BJP ka don sha lyndet. Mynta kine ki UDP kin nym lait, ki la kut,” u la ong.
