Shillong, Naitung 08
Ka Directorate of Food, Civil Supplies and Consumer Affairs jong ka sorkar Meghalaya ka la pynlong ia ka jingïalang halor ka Price Monitoring System ha Secretariat, Shillong, ha ka sngi Ba-ar, ka jingthmu ka long ban pynkhlaiñ ïa ka jingpeitngor ïa ka dor, ban pynthikna ïa ki rukom treikam ba hok ha ka ïew ka hat, ban ïada na ka jinglum pisa jong ki nongthied nongpet.
Ka jingïalang ka la wanrah lang ïa ki heh Sorkar na kylleng ka Jylla, kynthup ïa ki nongmihkhmat na ki distrik bapher-bapher bad ki Civil Sub-Division, ban ïamir jingmut halor ki rukom peit bniah ïa ka dor bad ai jingtip kiba la don lypa bad ban weng ïa ki jingeh kiba ïakynduh ha ka por ba pyntreikam na bynta ki paidbah.
Haba ai jingkren ha kane ka jingïalang, u Myntri ba dei peit ïa ka tnad marbam mardih, u Bah Methodius Dkhar, u la pynpaw ïa ka jingkitkhlieh jong ka Sorkar ha kaba buddien ïa ka dor jong ki marbam ba kongsan bad ban ïada ïa ki nongthied nongpet, khamtam eh ïa ki longïing kiba don jingma, na ka jingktah jong ka jingkiew dor bym thikna lane khlem nongrim.
U la ong ba ka jingpeit bniah ïa ka dor kaba biang bad kaba biang por ka long kaba kongsan bha ban ïada na ka jingshah shitom jong ki nongthied namar ka jingkiew dor jong ki marbam.
U Bah Methodius u la ban jur ïa ka jingdonkam ban ai jingtip man ka por bad kaba thikna, da kaba kdew ba ka tnad ka lum ïa ki jingtip shaphang ka dor jong ki 41 tylli ki mar ba kongsan na ki Distrik bapher-bapher jong ka Jylla.
U la kyntu ïa ki Price Monitoring Centre bad ki heh kiba ïadei kam ban buh hakhmat eh ïa ka jingai jingtip ha ka por kaba biang, da kaba pynpaw ba ki jingtip kiba lah ban shaniah ki long kiba donkam bha ïa ka Sorkar ban buddien ïa ka jinglong jingman jong ka dor bad ban shim ïa ki lad ki lynti kiba biang ha kano-kano ka por ba donkam.
Da kaba pdiang ïa ki jingeh ba ki heh Sorkar ha ki jaka ba jngai ki ïakynduh, khamtam eh ïa ka rukom ai jingtip, u Bah Methodius u la pynshlur ïa ki nongïashim bynta ban ïasam paidbah ïa ki jingeh jong ki.
U la kdew shuh-shuh ba ka jingdon jong ki ophisar na ka Ministry of Consumer Affairs, Food and Public Distribution, Government of India, ka la ai lad ïa ki ophisar jong ka Jylla ban pynpaw ïa ki jingeh bad ki paidbah ban pan jingshai halor ki mat kiba ïadei bad ka jingpyntreikam ïa ka Price Monitoring System.
Ha katei ka prokram, ka Assistant Director, Ministry of Consumer Affairs, Food and Public Distribution, Government of India, ka Radhika Goyal bad Senior Statistical Officer, Ministry of Consumer Affairs, Food and Public Distribution, Government of India, u Sandeep Kumar, ki la ai ki jingkren halor ka rukom peit bniah ïa ka dor, ki rukom ai jingtip bad ki jingdonkam ban peitngor.
Ki ophisar na ki District bapher-bapher bad ki Civil Sub-Division ki la ïashim bynta ruh ha ka jingïalang ha kaba ki la wanrah bad pan jingshai halor ki katto katne ki mat bad ki jingeh ba ki ïakynduh haba buddien bad ai jingtip ïa ka dor jong ki mar ki mata ha la ki jong ki jong ki jaka.
Ha kane ka jingïalang la wan ban ïashim bynta da u Commissioner and Secretary, Food, Civil Supplies and Consumer Affairs, u Pravin Bakshi, IAS, kong I Mawlong Director, Food, Civil Supplies and Consumer Affairs, ki heh jong ka tnad bad kiwei kiwei ki nongïashim bynta.
