Shillong, Nailur 08
Ka Khasi Students’ Union (KSU) ha ka sngi Ba-ar jong ka taïew, ka la kynnoh ba ka don ka jingleh shiliang khmat ban kem briew da ki pulit hadien ka jingjia thombor ba la mih na ka rally arshaka ha ka 19 tarik u Naitung, 2026.
U General Secretary barim ka KSU, u Samla Donald Thabah u la ong ba bun ki nongïalam bad ki dkhot ka seng ki la ïoh pdiang ïa ka jingthoh bad shu kem khlem nongrim.
“Bun ki la ïoh pdiang ïa ki jongthoh. Arngut ki dkhot ka KSU ki la shah kem haba ïadei bad ka jingpyrshah ba tei beaiñ ïa ka mandir ha phyllaw ka CBI. Hadien ba ki la shah khot hajir halor katei ka mukotduma, ki la shah kem pat na kawei ka mukotduma. U wei la pyllait noh namar ba um shym la don bynta ha ka rally. Kumta ngi sngew ba ka don ka jingleh bakla hapoh ka tnad pulit bad kane ka kadei ka jingleh shiliang haba ïadei bad ka jingkem khlem nongrim,” ong u samla Donald Thabah.
Haba buh jingkylli ïa ka jingbym leh eiei ki pulit ïa kito kiba pynthut ïa ka ‘Public Hearing’ na ka bynta ka Shree Cement ha EJH, u la ong “Lada ki lah ban kem ïa ngi, balei pat kim lah ban kem ïa kito kiba pynthut ïa ka ‘Public Hearing’ na ka bynta ka Shree Cement Limited, kum ïa kito ki briew kiba kawang maw bad kito kiba tih ïa ka surok markhmat ki pulit bad ki bor district”.
U la pyntip ba ka KSU EJH Unit bad ki nongshong shnong ka Elaka Nongkhlieh ki la ujor da ka ejahar sha ka Crime Branch hadien ba la kut ka jingaipor ka seng 3 sngi ïa ka Sorkar ban kem ïa kitei ki briew
“Ngin sa peit ki pulit kin leh eiei ne em pyrshah ïa kiba pynthut ïa ka ‘Public Hearing’,” la ong u Samla Donald.
U la bynrap, ba kane ka jingshah kem kan yn pynkynrandien ïa ka seng, ha ka ban ïeng na ka bynta ka bit ka biang jong ki paidbah.
Haduh mynta, san ngut ki nongïalam ka KSU, ba kynthup u President, Samla Raymond Kharjana, Vice President, Samla Pynkmenlang Sanmiet bad u General Secretary, Samla Reuben Najiar, kiba la shah kem haba ïadei bad ka jingmih ka huri hura myn ha ka 19 tarik u Naitung 2026, kaba ar tylli ki kali la shah thang, 31 tylli ki kali la shah pynjulor bad shah shoh 18 ngut ki briew.
