Shillong, Nailur 08
Ka kam shakri jong ki nos ha North Eastern Indira Gandhi Regional Institute of Health & Medical Sciences (NEIGRIHMS) kan bteng kumba ju long ha ka Sngi Balang hadien ba ka NEIGRIHMS Nurses Association (NNA) ka la mynjur ban pynkynriah noh ïa ka rai ban shim shuti paidbah (jong ka) da hynñiew sngi.
Ka seng ka la pynbna ïa ka rai ban shim shuti paidbah ha ka 9 tarik u Nailur ban pynbor ïa ki jingdawa kiba sahteng la slem bah jong ka, hynrei ka la rai ban pynsangeh noh shuwa hadien jong ka jingïalang bad ki bor pynïaid jong kane ka shlem pule bad ai jingsumar ha ka Sngi Ba-ar.
Ha ka kyrwoh khubor, ka NNA ka la ong ba ki bor pynïaid ki la pan por shi taïew ban rah ïa ki mat sha ka tnad ka koit ka khiah ka Sorkar Pdeng (MoHFW) hashuwa ban pynlong ïa ka jingïalang ‘Governing Council’ (kaba la tyrwa) jong ka NEIGRIHMS.
Ka NNA ka la ong ba ka jingpynkynriah shipor ka long ban ailad ïa ka jingïakren kaba tei, hynrei ka la kren shai ba ym shym la weng noh ïa kawei ruh na ki jingdawa jong ka.
Ki jingdawa ki kynthup ïa ka jingthung kam ba man ka por ban pyndap ïa ki kam ‘Nursing Officer’ kiba lait, ban pyndam noh ïa ka jingtyrwa ban aiti shabar ïa ki kam shakri ba ïadei bad ki nos, ban pyntreikam ïa ka ‘Office Memorandum’ ka MoHFW, jong ka 30 tarik Jymmang, 2026, bad ka jingpynlong kloi ïa ki eksamin thung kam ba sahteng.
Ka seng ka la maham ba lada ym don kano-kano ka dak jingkyrmen kaba tikna ha ka por kaba la buh ha kine ki hynñiew sngi ban wan, kata kan ïaid shakhmat bad ka jingsangeh treikam kaba khlem buh por naduh ka 17 tarik u Nailur katkum ka jingpynbna jong ka kaba 14 sngi.
