Shillong, Nailur 09
U Bah VGK Kynta u la mih shakhmat ban pynshai sha ki paidbah ba un ïakhun beit ïa ka ilekshon MP Lok Sabha shiteng samoi na ka UDP.
Kane ka jingmih u Bah Kynta ban ai jingpynshai ka dei hadien ba la mih ki khubor hamsaia ba un nym ïakhun shuh ïa ka ilekshon MP Lok Sabha hadien ba la mih ki khubor ba ki 9 ngut ki MLA ka UDP kin rung sha ka BJP bad 2 ngut kin rung sha ka NPP ka la pynlong ïa u Bah Kynta ban pynshai sha ki paidbah.
U Bah VGK Kynta u la ong ba u la shah jied na ka UDP ban long kum u kyrtong kaba la mynjur lang bad ki nongïalam ka seng, ki nongtrei, ki longkmie, ki samla ha kaba la ïadonlang baroh ki MLA bad MDC ka UDP ha ka jingïalang ha ka 28 tarik Jymmang 2026 ha ka ophis ka UDP.
U la ong ba u don la ka jong ka thong bad ka jingthmu bad ka jing-ngeit sha ki paidbah ka Shillong Parliamentary Constituency bad u la kyrmen skhem ba ki paidbah kin jied ïa u ba un lah ban jop ha kane ka MP ilekshon ban pynkut ïa ka samoi treikam ka ban neh kumba 24 bnai.
U la ong biang ba ki khubor hamsaia ki dei tang ki khubor thok suda kiba la pynmih ban shu pyntieng bad pynkulmar ïa ka jingmut jingpyrkhat u paidbah. Ka UDP ka dei ka kynhun ba la bat da ki briew kiba lah ban wan bad leit katkum ka jingkwah jong ki.
Ka kyntien jong nga ka long, “Phim lah ban pynbiej ïa ki paidbah bad ka jingiai ban jong nga ka long ka jingkitkhlieh bad ka jinglong khuid” u la ong.
Ka jingmih khubor ha kine ki sngi ba ki khyndai ngut ki MLA ka UDP kin rung noh sha ka BJP bad ar ngut kata u Bah Nujorki Sungoh uba la jop arsien na ka UDP bad u Bah Renikton Lyngdoh na Mawkyrwat kin rung sha ka NPP, kaba sah mynta ha ka UDP satang u Bah Metbah Lyngdoh u MLA ka Mairang Constituency uba dei ruh u President ka UDP.
Kine ki khyndai ngut ki MLA ka UDP kiba thmu ban rung sha ka BJP ki long u Bah Paul Lyngdoh na West Shillong, Bah Lahkmen Rymbui na Amlarem, Bah Mayralborn Syiem na Nongpoh, Bah Synsharkupar Lyngdoh Thabah na Sohiong, Bah Kyrmen Shylla na Khliehriat, Bah Pius Marwein na Ranikor, Balajied Synrem na Shella, Bah Olan Suin na Mawsynram, Bah Matthew Beyonstar Kurbah na Mawphlang.
