Shillong, Nailur 09
Ha ka jingkhih phaloh ka kam saiñ hima sima ha ka Jylla naduh ba mih khubor ba la kynnoh ba don ki nongmihkhmat jong kiwei pat ki party ban pynïasoh noh sha ka Bharatiya Janata Party (BJP), u Bah Ardent Miller Basaiawmoit, President ka Voice of the People Party (VPP) u la ong ba ka BJP ka don la ka jong ka thong treikam.
Haba pynpaw ïa kane sha ki nongthoh khubor, u Bah Ardent u la ong ba ka BJP ka dei ka ‘Political Front’ jong ka Rashtriya Swayamsevak Sangh (RSS) bad ka thong kaba paw shai jong ka, ka long ban pynduh jait ïa kiwei pat ki sengsaiñ pyrthei kum ka Congress bad kiwei de ki seng trai ri.
U la ong ba um lah ban kren beiñ ïa ka thong ba ka BJP ka don, hynrei ka shong pat ha ki paidbah la kin pynkupbor ne em ïa ka khnang ba kan lah ban pynurlong ïa ki thong treikam kiba ka don.
U la pynpaw ba ka VPP ka don ïa la ka jong ka thong kata ban wanrah ïa ka synshar khadar kaba khuid ba suba bad ban ïada ïa ka jinglong kyrpang ki trai ri. “Ka synshar khadar kaba khuid ba suba, ban pynthikna ïa ka roi ka par kan shisha bad ki aiñ ki ban ïada ïa ngi ki trai muluk ki trai jaka, namar ngi long kiba rit paid, ka shong ha ki paidbah la kin pynkupbor ne em ïa ngi ba ngin lah ban pynurlong ïa ka thong bad lada ki ai ïa ka bor ngin leh ïa kata” u la ong.
Nalor kata, u la buh ruh ka jingkylli ba lada ka BJP ka ïoh ban synshar ha kane ka Jylla, hato ki paidbah kin dang don ïa ka hok ban kylli jingkylli bad kumta lada ki paidbah ki pdiang ïa ka BJP ka mut ki la pdiang ruh ïa ka nongrim.
U la bynrap ba ka don ka jingma kaba khraw lada ka BJP kan ïoh ban ïalam ïa ka Sorkar hapoh ka Jylla bad ka bor mynta ka shong ha ka jingstad jong ki paidbah ban bishar ïa ki jinglong jingman jong ka saiñ pyrthei ha ka Jylla.
