Shillong, Nailur 09
U Myntri ka tnad Labour, u Bah Methodius Dkhar ha ka Sngi Balang u la ong ba ka jingpynrung kyrteng ïa ki nongbylla ba nabar hapoh ka Meghalaya Identification, Registration, Safety and Security of Migrant Workers (MIRSS) Rules ba la wanrah jingkylla, kam dei ban long ka atiar na ka bynta ka jingshah pyndik, da kaba ban jur ba ka long kaba donkam ban pyntikna ïa ka jingïada bad ka jingshngaiñ jong ki.
Haba kren ha ka ‘State-Level Launch-cum-Orientation Programme’ na ka bynta ki kyndon ka MIRSS ba la pynkylla jong u snem 2026, ka ‘e-payment gateway’ na ka bynta ban siew ïa ki kuna, bad ka Standard Operating Procedure (SOP) ba la pynlong da ka tnad Labour, Employment and Skill Development ha State Guest House, Tara Ghar, u Bah Methodius u la ban jur halor ka jingdonkam jong ka jingïatreilang na ka bynta ka jingpyntreikam kaba paka ïa kane ka saiñdur bathymmai.
“Ka donkam ïa ka jingïatreilang hapdeng ki pulit, ki bor distrik, ki nongai kam, ki kontraktor, ki Trade Union, ki seng ha ka imlang-sahlang bad ki nongbylla nabar na ka bynta ka jingpyntreikam hok ïa ka saiñdur kaba thymmai,” la ong u Bah Methodius.
U la ong ba ka tnad Labour kan don ka bynta kaba kongsan ban pyntikna ba ïa ki kyndon jong ka aiñ la pyntip bad pyntreikam hok ha ka rukom ba dei ha kylleng ka Jylla, da kaba pynleit jingmut ha ki saw tylli ki bynta ba kongsan – ka jingpynsngewthuh, ka jingpynsuk, ka jingjurip bad ka jingpyntreikam.
U Bah Methodius u la kyntu ïa ki Deputy Commissioner (DC) bad ki ophisar ka distrik ban ïatreilang bad ki ophisar ka tnad Labour khnang ban pyntikna ïa ka jingpyntreikam kaba paka.
Halor ka bynta jong ki pulit, u la ong, “Ka saiñdur treikam ba la pynkylla ka ailad ïa ka jingïatreilang kaba ïajan hapdeng ki bor pulit bad ki ophisar ka tnad Labour. Ki jingujor kiba ïadei bad ka jingshah pyndik, jingshah pyntieng, jingshah ban-beiñ, jingshah pynmynsaw ne kiwei-kiwei ki kam be-aiñ pyrshah ïa ki nongbylla sngi dei ban rejistar mardor, tohkit bad leh katkum ka aiñ.”
U la ban jur halor ka jingdonkam ban don ka jingïatreilang hapdeng ka Meghalaya bad ki Jylla na kiba ki nongbylla ki wan, khamtam eh na ka bynta ban pynithuh, ban pynshisha, ban ai jingïarap kyrkieh, jingkyrshan bad ka bha ka miat.
U Bah Methodius u la ong ruh ba ki nongaikam, ki kontraktor bad ki karkhana ki dei ban don ka jingkitkhlieh ïa ki nongbylla bad ban pyntikna ïa ka jingshngaiñ jong ki khnang ban ïoh bynta lang ïa ki jingmyntoi katkum ki kyndon jong ka Sorkar.
“Ki nongbylla ba nabar ki noh synñiang shi kat dei sha ka ïoh ka kot ka Jylla bad ki trei ha ki kam shna ïing, ki jingtei, ka koit ka khiah, ‘Hospitality’, ka rep ka riang bad ki kam shna tiar shna tar. Ka jingpynrung kyrteng kaba biang kan ailad ïa ka Sorkar ban pynithuh ïa ka jaka ba ki trei bad ban ïarap ïa ki ha ka por ba don ki jingeh. Hynrei, ka jingpynrung kyrteng kam dei ban long ka atiar na ka bynta ka jingshah pyndik ne buh jingeh ïa ki nongtrei bad ki nongai kam. Ka dei ban burom ïa ka jinglong shimet bad ïa ka burom jong ki nongtrei,” u la ong.
Ha kane ka sngi la ïoh ruh ïa ka jingkren na u Commissioner & Secretary, u Dr. B.D.R. Tiwari uba la ong ba la wanrah ïa ki kyndon pynkylla, 2026 ban pynkhlaiñ shuh-shuh ïa ki bynta bapher-bapher jong kane ka aiñ, ïa kaba la sdang nyngkong ha u snem 2020 bad pynkylla pat ha u snem 2024.
