Shillong, Nailur 09
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ka jingshah prong tuh jong ki dukan bad ki ïing ha kylleng ki bynta jong ka nongbah Shillong kiba la jia ha kine ki khyndiat sngi.
Katkum ka khubor na ki pulit la ong ba u Jagmohan Agarwal, uba long lang u trai jong ka M/s Jyoti Enterprise u la ai ka jingujor ba ha ka 5 tarik mynta u bnai, ha ka por kumba 3.30 mynstep, ki runar bym lah ban ithuh, ki la prong tuh hapoh ka dukan ka jong u, kaba don ha Nongshiliang Nongthymmai, Shillong bad ban tuh ïa ki ‘copper wire’ kiba shongdor kumba T.20,000/-.
Na ka liang jong u Rajesh Kumar, Proprietor jong ka M/s B.R Traders ruh u la ai ka jingujor ba ha ka 5 tarik mynta u bnai, ha ka por kumba 3.30 mynstep, ki runar bym lah ban ithuh ki la prong tuh hapoh ka dukan ka jong u, kaba don ha Nongshiliang, Jingkieng, Shillong bad ban tuh ïa ki waiar bad ki nar rod kiba shongdor kumba T.15,000/-.
Ha kawei pat ka khubor, u Anthony Yeh u la ai ka jingujor ba ha ka 6 tarik mynta u bnai, ha ka por kumba 8.30 mynmiet, ki runar bym lah ban ithuh, ki la prong tuh hapoh ka ïing jong u kaba don ha Laitkor Dongshaneng, Shillong bad ban rah tuh ïa kawei ka laptop, ki jaiñ, ki juti bad kiwei-kiwei ki tiar kiba la shongdor kumba T.4 lak.
Katba na ka liang jong u Ranjit Barman u la ai ka jingujor ba ha ka 7 tarik mynta u bnai, ha ka por kumba 3.50 mynsngi, ki runar bym lah ban ithuh, ki la tuh ïa kawei ka ‘Bluetooth speaker’ kaba shongdor kumba T.20,000/-, na ka ïing sah ka jong u, kaba don ha Madanrting Block-F, Shillong.
Katba na ka liang jong ka Ceelon L Tariang ka la ai ka jingujor ba ha ka 7 tarik mynta u bnai, ha ka por kumba 2.30 dang step, ki runar bym lah ban ithuh ki la prong tuh hapoh ka dukan ka jong ka, kaba don ha Nongthymmai, Shillong bad ban tuh ïa ki synduk CCTV bad ka pisa kaba long T.2,500/-.
