Shillong, Nailur 10
Ki bor District ka South West Garo Hills ki la pynkynriah bad ai jingïarap ïa kawei ka longïing ha ka shnong Murikhati ha South West Garo Hills hadien ba ki hati khlaw ki la pynjulor ïa ki ïing ki sem jong ki.
Katei ka jingjia ka la jia ha ka por kumba 12:30 shiteng synñia ha kaba ki hati khlaw ki la pynjulor ïa ki ïing sah jong u Khetish Hajong bad ka Obharani Hajong.
Ka kamra shet bad ka kamra buh mar jong u Khetish Hajong bad ka kamra shet jong ka Obharani Hajong ki la shah pynjulor.
Hadien kane ka jingjia, na ka liang ka District Disaster Management Authority, South West Garo Hills, ka la ai jingïarap mardor bad sam marbam sha u Khetish Hajong.
Ki bor district ki la ïathuh ba la lum ïa ki jingtip ba bniah jong ki longïing kiba shah ktah bad la pynshisha na ka bynta ban ïoh jingïarap.
Ki bor district ki la ong ba la ai jingïarap ha ka por kaba biang sha ki shnong, kiba shah ktah na ka jingwan pynjot ki mrad khlaw.
