Shillong, Nailur 10
Hapdeng ka jingsawa kaba jur ba 9 ngut na ki 12 ngut ki MLA jong ka ki thmu ban rung sha ka BJP, ka United Demo-cratic Party ha ka sngi Palei ka la ong ba ka jingkhang jong ka, ka plie na ka bynta ka jingïakren bad ka plie ruh wat ban pynkylla nongïalam lada donkam.
U General Secretary ka UDP Bah Titosstar-well Chyne u la ong ba ka UDP kam pat ïoh kano-kano ka jingpyntip kaba thikna halor ka jingthmu phet seng jong ki MLA.
“Ym shym la don kano-kano ka shithi ne jingtip ba thikna na uno-uno u MLA haduh mynta ka sngi,” u la ong.
U la ong ba u la ïakren ïa ki MLA bunsien hynrei um shym la ïoh ïa ka jubab kaba shai.
“Nga la ïakynduh ïa ki bunsien bad nga la phone ïa ki, hynrei kim shym la ai ïa ka dur kaba shai la kin leit sha kiwei pat ki seng. Kim shym la kyntait ne pynthikna,” u la ong.
U Bah Titos u la ong ban kynnoh ïa u President ka seng na ka bynta ka jingpynroi ka long kaba suk, hynrei ïa ki kam hapoh ka seng dei ban ïakren haba shit ba shai.
“Lada don kano-kano ka jingthut ha kaba ïadei bad ruh lada ngam pat long uba bit kum u General Secretary, phi lah ban kdew beit beit. Ka shuki President ne General Secretary kam dei ka mar shimet, ka dei na ka bynta ka jingmyntoi jong ka seng. Ka jingkhang ka plie beit ban ïakren ïa ki jingeh,” u la ong.
U la pyntip ba la khot ïa ka jingïalang kyrkieh jong ka Central Executive Committee (CEC) ha kane ka sngi Thohdieng kaba ïatyngkhuh ruh bad ka sngi rakhe ïa ka jingseng ïa ka UDP.
“Ngi la dep ban phah ïa ka jingkhot sha baroh ki MLA, ki MDC, ki President, ki Secretary bad ki dkhot ka CEC ban rakhe ïa ka sngi seng bad ban ïakren ïa ki mat,” u la ong.
Halor ka jingkylli hato yn bthah ne em ïa u Bah Metbah Lyngdoh ban hiar shuki kum u President, u Bah Titos u la ong, “Lada u Bah Metbah ne ma nga, ngi long ka daw ba ki kwah ban phet seng, nga long uba kloi ban ong ïa u ba un hiar shuki khnang ba ngin lah ban tei pat bad pynkhlaiñ ïa ka seng. Hynrei ban dawa weng noh khlem daw ka long kaba ym sngew ïahap.”
Haba kylli hato ka jingbym sngewhun ka mih na ka jingpynkylla ïa ka kynhun Myntri kaba dang shen, u la ong ba ka long shabar ka jingtip ka jong u bad ba ka dei ka kamram jong u Myntri Rangbah ka Jylla.
