Shillong, Nailur 10
Da kaba kynnoh ba ki polisi ha ka tnad pule puthi hapoh ka jingkmih u Commissioner & Secretary, u Vijay Kumar Mantri, ki la mih ka jingpynkheiñ ha katei ka tnad, ka Voice of the People Party (VPP) ha ka sngi Palei ka la dawa ban weng noh ïa u.
Ha ka kyrwoh ba la phah da u President ka Voice of the People Party (VPP), u Bah Ardent u la ong ba ka rukom pynïaid ha ka pule puthi, ka la wanrah ïa ki jingeh kiba jur, khamtam eh ki polisi halor ka rukom siew tulop kaba la buh ryntih, jingmyntoi ki nonghikai ha ki skul ba ki ïoh ïa ka deficit grant in-aid, ki kyndon jong ki kam bad ki kyndon rukom pynïaid ïa ki skul, ki la wanrah ïa ka jingbym shngaiñ hapdeng ki nonghikai, bad pynmih ruh ka jingkylli halor ka long ka man jong ka pule puthi.
“Ka rukom pynkhreh bad pyntreikam ïa kine ki polisi, lah ban long kum ki kam pyrshah ïa ki paidbah bad khlem da pyrkhat ïa ka jingdonkam jong ki nong-hikai, ki shnong bad ka imlang ka sahlang,” la ong ka VPP.
“Ka rukom pyntreikam ha ka tnad pule puthi, kam long tang ha ka jingpynbeit uno-uno u ophisar Sorkar, hynrei kadei ban shimkhia ïa ka jinglong kyrpang jong ka imlang ka sahlang, ka jaka bad ka jingdonkam jong ki paidbah ka Jylla,” ka la ong.
Haba dawa ban weng noh mardor ïa u Vijay Mantri, ka VPP ka la ong ba ka tnad ka donkam ïa ki nongïalam kiba sngap ïa ki nonghikai bad kiba burom ïa ka jinglong ba kyrpang jong ki shnong bad ka Jylla, bad kaba buh ruh shuwa ïa ka jingmyntoi jong ki samla pule, ki paidbah, ym ka jingmyntoi ki ophisar.
