Shillong, Nailur 10
Ki nongri jingri khamtam ki nongri sniang ba na kylleng ka Jylla ha ka sngi Palei ki la wan ban ïashim bynta ha ka jingïaid kjat ban rah ‘placard’ ban dawa na ka Sorkar Jylla ban pynurlong ïa ki jingdawa kiba ki nongri jingri ki la ïai pynsngew na ka por sha ka por.
Kane ka jingïaid kjat ka dei kaba la sdang nakhmat u Mot Woh Kiang Nangbah bad la pynkut ha madan Malki, Shillong bad la wan ban ïashimbynta lang ki nongri sniang ba na kylleng ki District ha kaba ki la wanrah ruh ki sniang ban pynpaw ba ka jingeh kaba ha khmat eh jongki ka dei halor ka jingïap khlam ki sniang na ka jingsar ka jingpang African Swine Fever (ASF).
Ïa kane ka jingïakhih kaba jai-jai, ki nongri sniang ki la pynlong halor ki katto katne tylli ki mat jingdawa ba ka Sorkar ka dei ban pynurlong, kiba kynthup ba ka Sorkar ka dei ban map noh ïa ka ram ba ki nongri sniang ki shim na ka skhim Piggery Mission, ban siew bai lutksan ïa ki nongri sniang kiba la shah ktah ha ka khlam ASF, ban don noh ki khyrdop peitbniah (Check Point) ha ki Inter State Border khamtam ha Jorabat lane Byrnihat, ban pynurlong noh ïa ka Agriculture Policy bad kiwei kiwei.
Ka jingdawa ban don noh ïa ki khyrdop peitbniah (Check Point) ka long khnang ban lah ban pynthikna ïa ka jingkoit jingkhiah jong ki sniang kiba wan nabar kumjuh ruh ba kan long ka jingshngaiñ ïa ki nongbam doh shniang ba hapoh ka Jylla khamtam ba kan long ruh ka jingïada ïa ka jingwanrah jingpang ki sniang kiba wan nabar bad ba ki nongri sniang ka Jylla kin lait ka jingïap khlam ki sniang.
Haba kren sha ki nongthoh khubor u General Secretary ka Hill Farmers Union (HFU) u Bah Alfonbirth Kharsyntiew u la ong ba ki nongrep ki la dep ban pynsngew sha ka Sorkar halor ka jingeh ba ki nongri sniang ki kynduh namar ka jingwan lynshop ka khlam ASF, hynrei haduh mynta ka Sorkar kam pat shim ïa kino-kino ki sienjam ban ïarap ïa ki nongri sniang.
U Bah Alfon u la ïathuh ruh ba ki nongrep ki kmen hadien ba ka Sorkar ka wanrah ïa ka skhim Piggery Mission bad bun ki nongri sniang ki la ïatreilang bad ki Cooperative Societies, Farmers Producer Organizations bad Producer Groups ban shim ram ban thied khun sniang, hynrei ka jingwan lynshop ka khlam ASF ka la wanrah ka jingduhnong ba khraw ïa ki nongri sniang.
Shuh-shuh u la ïathuh ba katkum ka jingïoh lum jingtip ka HFU, ki don kumba 1200 tylli ki longïing kiba shah ktah namar ka jingwan lap ka khlam ASF, namar kata “Ngi dawa na ka Sorkar ba ka dei ban ïarap ïa ki nongri sniang kata da kaba map noh ïa ka ram ba ki dei ban siew kaba ki shim na ka bynta ban thied khun sniang.
U Bah Alfon u la ong ruh ba ki nongri sniang ki dawa na ka Sorkar ba ka dei ban pynïeng noh da ki khyrdop (Check Gate) ha ki thaiñ khappud bad ban pyntreikam ïa ka Standard Operating Procedure (SOP) ba la pynmih da ka tnat Animal Husbandry and Veterinary ha ka 19 tarik Naitung 2023.
