Shillong, Nailur 10
U Myntri Rangbah ka Jylla Conrad K Sangma ha ka sngi Palei, u la plie paidbah ïa ka Block Integrated Development Complex ka Rongara C&RD Block ha South Garo Hills District.
U MLA ka Siju-Rongara Rakkam A Sangma u la ïadonlang ha kane ka jingïalang.
Haba ai jingkren, u Myntri Rangbah u la ai ka jingïaroh ïa u MLA namar ka jingtrei shitom jong u bad ka jingaiti lut sha ki paidbah ka Constituency jong u.
“Kane ka building thymmai ka Block ka dei u soh ka jingtreikam ba shisha jong u MLA bad ka jingïohi jngai na ka bynta ka roi ka par jong ka thaiñ,” u la ong.
U la kyntu ïa ki nongtrei jong ka Block ba kin shakri ïa u paidbah da ka jingleh hok bad jingaiti lut.
“Ha ki jaka kyndong, ki paidbah ki ju leit sha ki ophis ka Block da ka jingkyrmen ba kan weng ïa ka jingeh jong ki. Ki nongtrei ki dei ban shah skhor ïa ki, sngewthuh ïa ki jingeh jong ki bad ban wad ïa ki lynti ban weng ïa ki,” u la ong.
U Myntri Rangbah u la ong ruh ba ka Sorkar kala kyntiew kyrdan mynta ïa ki jingtei ha kylleng ka Jylla ha kine ki lai snem bala leit noh.
U ong baroh ki 56 tylli ki C&RD Block ha Meghalaya ki dei kiba la dep maramot pura lane la ïoh da ka building ba thymmai. Ka jingthmu ka long ban pynjanai ïa ka jingai jingshakri ïa u paidbah bad ai ïa ka jaka treikam kaba kham biang ïa ki nongtrei.
U Conrad u la ban biang ïa ka jingkut jingmut jong ka Sorkar ban wanrah shajan ïa ka synshar khadar sha u paidbah bad ban pyntyllun sted ïa ka roi ka par, khamtam ha ki jaka kyndong bad jaka khappud.
